Lorung Malabit
Mala-soneto
*
Anggiang makananu kung balikbalikan,
e naya magbalik maski kapilan man,
ing mengalabas nang buri ku sang bayuan,
ban kanita sinta, magbalik ka naman.
**
Paglasakan ku man pelalung ing banua,
e na masamasan itang melasak na.
Ing salu mung miuman kung ginabak sinta,
anggiang samasan ke e ne masamas pa.
***
Ing pamagsisi ku bina nang mitawli,
uli ning depat ku aniang pekatawli.
Nung ikang inuna ku’t iyang tinawli,
ala ku sang sisian ngening bandang tawli.
****
Ngeni, gumaga kung king banua man sukdul,
sayang namu ing lua, metambun ne’ing kulkul.
Rodel E. Gozum
09 Junio 2023
San Simon