Kanitang minuna, ing aldo ning layâ
neng pagmasusian de, king kekatang bangsâ
ing pamanalala, king tune nang diwâ
king pusu ring masa, mapali pang binâ
Para karela ing, aldo ning kalayan
pamangilala ya, ketang kadakilan
ding bayani tamung, mekisalpitikan
karetang kastila, a mapanalipan
Kanita ing petsang, a dosi ning Hunyu
neng pagmasusian de, keti kekatamu
ing lalto mensahi, king pusu ring tau
pamisasanmetung, da ring pilipinu
Dapot ngeni kening, kanakung pamalak
ing aldo ning laya, metung yang palabas
ban ipakit tamu, mabilug a labuad
a timawa ne ing, bangsang Pilipinas
sayang ing paninap, a meyalang kalmâ
ding bayani tamu, a mibubung dayâ
uling angga ngeni, e ta pa timauâ
ketang alino ning, pagbitkil at lugmâ
ita’ng tanikalang, king balen migapus
a kelikat da ring, kekata sinakup
king angga man ngeni, e ya pa mepatlud
o melubak mu man, king pangakulaput
Makasaklit ya pa, karing bitis tamu
at karing batal da, ring pakakalulu
imbis makalag ya tigik de pang ustu
Ding aliwang sukib, a taung gubyernu
Uling ding mapilan, karing manungkulan
pemulian da wari, itang kasangilan,
kasakiman ampon ugaling lamiran
da retang sinakup, kaniting balayan
Asabi ta kaya, ing timawa ta na’?
nung e pa mimiral ing tune hustisya
nung king kakaluluan, makagapus ta pa
at e ya pa ganap, ining demokrasya
Kabang ing gubyernu, mistula reng pugad
a daratunan da, ring mapanarampas
Tune katimawang, pagnasan ta mekad
angga nia rugu king, kekatang paninap
Iwagwag de kanian, ing bandera tamu
king petsa a dosi, a bulan ning Hunyu
keraklan ding akit, ta’ng mamanyaludu
ILA pin ding “DAPUNG”, mikatawan tau…
Vhelle V. Garcia
June 6, 2015
United Arab Emirates
