nang: PL Sergio Gramonte Calayag
Misan aldo katimauan, ing kanakung atandanan
Mayor Pedro L. Mendiola, mamuntukan keti Bamban
Ing mesabing kayaldauan tune iyang pagmasusian,
Ketang oras kayabakan, magawa ya ing tiuntiunan
Itas de itang bandera saka iya ing saluduan
Ating parada king dalan deng magaral yang abayan
‘ting amateur singing contest, pangaras na ning kabengian
Damdaman mu la kanita, dening dakal kayanakan
Ila rening mamakiabe papalista keng tiuntiunan
Mangasanting la reng bosis, iya ining pilabanan
Ikanta me ketang tonu, gitarista iyang tukian
Matenakang gitarista ining Basanio Sangalang
Anam nakung banua idad, tutung ali pa magaral
Ining malugud kung Tatang, ‘abe naku keng tiuntiunan
Kabud aku ing meyawus, ginale kung kawatasan
“Sintang Balen” ining kudta, inagkas ke keng arapan
Arap da reng dakal tau, ing dine ku yang lebanan
Gagaga ku at gagale, dapot e ku man tinuknang
Ing adanasan kang Tatang, tiwala na atsu kaku
Katalakad entebladu maili-maili I Tatang ku
Aku naman ing gagaga, arapan ding dakal tau
Inari ke ing poesia, e tinuknang keng gale ku
Akakit ku kang Tatang ku, tune pagmadagul naku
Mesikan ku pilubluban, kabang lal’uan I Tatang ku
Makanian kung mikadiwa keng kulturang kapampangan
Anak ku pa mung malati, tenam na ning kakung Tatang
Pepakit na at pepabal, ing amanu yang luguran
Manibat iniang anak ku, anting bini a mitanam
Kabud iya ing tinubu, sinesen ke at gimbulan
Alub namu e ya mate, bagkus iyang palabungan
Maragul ku pasalamat, kening megi nang kasaupan
Ning malugud kung pengari ining bini iyang tenam
Ing kulturang kapampangan kanaku yang pakamalan
E pabustan malumpawi, ban e mate keng sikluban
Inia metung talagambul, king amanu tamung menan
Alagad na ning kultura, manigobra yang gagawan.