Nang Apung Gusting
6/17/18 Riyadh, Saudi Arabia
I
Malugud ya’ing ibpa at mitmung ganaka,
Karing kayang ának, págkalub ing sabla.
Ding lipakang gamat ilang saksi’t tanda,
Ning kayang sipag king pámantun biyaya.
II
Likas king ibpa ing tibe at tétagan,
Ápanalígan ya king oras tátákan
Iya ing sandálan at iyang santúngan,
King nanu mang sagkul iya ing kambílan.
III
King kayang baintauo metung yang bayani,
Ápusa’na níti ing dapat nang sugui.
Ing anggang turu nang mayap a ugali,
Iti ing mipande kening mal nang suli.
IV
Ari yang malam king kayang dalagita,
Ibabye nang mayap agyang nanu pa’ita.
At alang milele king kayang prinsesa,
Nung é la mamun at paindispu kaya.
V
Kening katubaleng kayang pakamalan
Ala yang kapara o katumbas pa man.
King pamakyabe man, mipasoso misan
Dapot é palalu, keng reynang palsintan.
VI
Dakal pang kalidad ing é mesaglawe,
Dikil karing ibpang asyas da ring bale.
Alang kapupusan ing mayap a bage,
Kaministilan mung pugayan lang tune.