Ing metung a pulis, talacad ne sana’
ban munta istasyun, cayari ning misa’
dapot neng daca’la, ring taung sinimba’
pepabustan na nong munang lumual caya ‘
Mitagun a ketang, licluca’nang bangcu
dimdam ne ing anac a gulping mengucu
tutulu ing lua na niting pacaducu
arap rebultu ning Cristung macapacu
Pacacalale yang caniti linapit
pekiramdama’ne, anac a manangis
ayalac nang bigla, e ya mipaparis
sinelas ing anac caring cayang bitis
Ngana nitang anac, “Dios co saupan mu cu’,
ban macasali cung sinelas a bayu’,
agiang dinalan yang pesus sana Guinu,
pagcaluban mu cu”, nganang manigapu
King dimdam ning pulis, metagkil ya pusu
at ume mibalic ketang cayang bangcu
apibalac niti, a dina’na nemu
dinalan ing anac ban e nia mabigu
At ngana pa niting mipaisip bigla
ya ing ginamit na ning Dios a Dakila
bilang instrumentos king ban yang tumula
Ing mangading anac, king biling malugma
megut yang pitaca saca ne kilcalan
ding pera na pala sactu lang dinalan
macananu caya? nganang mimisip nyan
nung ibye cu la ngan ala nang mitagan”
inia ing depat na, kinua ne ing beinti’
ban ating gamitan, muling mamasahi’
at mecad ngana pa, ring ibie cung deti’
apanyali na nong sinelas na niti”
Inaus ne’ing anac, saca no inabut
king palad na niti ring otsenta pesus
at caibat ing anac ikit neng mengurus
saca ya mengadi arapa’ning curus
Guino salamat pu, caniting penandit
a dininan mu cung pera ban agamit
sana king tutuki ban alang mangupit
e yu no pu sana padalan king pulis
Vhelle V. Garcia
June 17, 2013
Abu Dhabi, United Arab Emirates