Belangkas at inulip nang Apung Gusting
4/5/2016 king Riyadh Saudi Arabia
I
Pakabanglú mé man ing samyú ning yangkâ,
Mísan matábang ya at mísan malabsâ
Pakapayit mé man ing búngang apalyâ
Mayumu ya lása, karen sablang bisâ
Nung manúlu ka king nanu mang mabayâ,
King úlung mapayit, mipaldan kang binâ
II
Pakasikan mé man ing kabayung gaindû
Bukud keng pulayi, kalesa ya’ing agyû.
Ing bákang masipag, king dimla isubû
Mamandal yang agad at pilmi yang dúkû.
Ing matuang damúlag, mamaglabak yámû
Kaleldo’t kauran, e me ápasúkû.
III
Pakatálas mé man ing báyung labásas
É mé apamángal keng dútung a masyas
Saldak ning palakul, kúkurug kakablas
É man makapaklí agyang métung balbas.
‘Yan mang talibung a kikintab king tálas
É mé apanulí ‘gyang kenu mang pantas.
IV
Akling ning kampanang samal á dupikal,
É né man agising, magtudturang banal
Ing santítang kósyang, a pané kumpisal,
Manindrédus ya rin, néng ábak kéta lual.
Kanangga na bátal ning tuksung patakal,
Misan ing ábitu, lukas neng pirapal.
V
Ing taung mégáral at maki títulu,
É na buri sabyan mayap ne’t pulídu.
Íng mágbububúbu a ala mang kursu,
Maralas king mísan ing ásal na pínu;
King pamakiutus king para mung tau,
E ya pegaralan ing gagawan metru.
VI
Íng balang bágé a atyú kéti súlip,
Atin yang kaníwan a kaya mu tiklip.
Nung nanung ayán na, alang makasilip
Bukud mu’ing panaun, yá mung makátílip;
Nung nánu ing súkung a kaya misánib,
Yápin ya ing kalmang kaya makatúlid.