nang:. PL Sergio Gramonte Calayag
Libo siam a dalan anam a pulu’t apat ya’ng banua
Mumunang aldo ning Enero iya ing mesabing petsa
Kanita re pegmasusian keta nang pangatatag na
Ing balen na ning Angeles meging ciudad tengalan ya
Linabung ya at minunlad, ining meging kabiayan na
Sinigpong anting agila, migpatilo karin banua
I Rafael del Rosario, iyang mayor mamuntukan
‘yang utak ning pangalalang, metung baleng kapampangan
At tauling tengalang mayor, anting balen a lalawan
Abe ne’y Enrique Tayag, abogadung matenakan
Sinulung ne king congreso, ban batas yang mituldukan
Juanita L. Nepomuceno, diputadong ating beluan
Ini nang Batas Pangbangsa, iya naman ing mepirma
Atlung libo pitung dalan, iya ing kabilangan na
Aldo aduang pulu’t adua, at bulan Junio kanita
Libo siam a dalan anam a pulu’t atlu yang banua
Ning pang-siam a presidente, keti bangsa tamung sinta
I Diosdado Macapagal, kapampangan ing lipi na.
Inia’ng pakamalang ciudad, barrio Culiat menibatan
Meging balen bandang tauli, keng kayang kasalesayan
Telakad de retang tau, ilang tutung matenakan
Pagsubuk man ing delanan, kipmuan tapang deng erapan
E dinuku at sinuku, pepakit da ing tetagan
Makanian ya ining Ciudad, iyang lugal ding matapang
