nang: PL Sergio Gramonte Calayag
Ing babaing Filipina anting tala ing sala na
Balang taung miyaslagan, mibabayu itang bie na
Anting aping milalablab, maglipato karin banua
Panandaman itang pali, darandaman ning pamilya
Pakiyarle keng aliwa yang parati nang mumuna
Pablasang mayumung lugud makatanam keng pusu na
Maniwala ketang mayap, kabanalan keting bie na
Malugud yang parang tau at malugud yang pamilya
Nung keng bale iyang Reina, asawa na iyang Ari
Gagalang ne keng desisyun nanu ya man ing pisabi
Dapot iya iyang lungub kareng bageng e aburi
Ipalino ing panig na, utus Ari yang mapakli
Kabud anak mamanuli, keng malukang pagkarinan
Ing mumunang panintunan itang malugud dang inang
Kabud akit mikatula, panandaman kapasnawan
Matula ya keng panyatang, itang Ima iyang kaulan
Gaindung manuk a lulukub, dening sisi lulukuban
Pangaras na ning kabengian dening sisi titipunan
Ketang lalam nitang salu, balu na la kabilangan
E ya tuknang mang mamawus anggat sisi e ya datang
Nung deni nang gaindung manuk, kareng anak malugud la
Mas lalu yang makayigit, ining Ima ning pamilya
E mu lukub ing parandam, nun’e lugud kabang bie ra
Pablasang daya ka’t laman, menibat king katawan na.
(Salamat kening Modelo kung malagu at maganaka,, Mam Leonida Dalusong Manaloto Desierto )
July 19, 2023
