nang: PL Sergio Gramonte Calayag
Kabud ilang pekanan mu, manuk, pusa ampon asu
Parati kang babalikan keng lugud a pepakit mu
Pilming deni e ka lakuan, magdatun la keng kekayu
Agyang kusa mong panabi, babalik lang anting yoyu
Animal lang masasabi dapot lugud panandaman
Masabal mu’t malasakit, iya ining peparandam
Kareng tau makanian rin, yumung lugud pairalan
Dumayu man kekang anak, pilming Ika ing balikan
Iniang ikeng bayung lipat keng malukang pagkarinan
Dening manuk, asu’t pusa, ila rening memanyatang
Bigla kaming mikasese, ing bale mi e na likuan
Maratun la keng paligid, ikua da na ping merakal
E ku mu ring pagmaragul, dakal taung mamisita
Keng maluka ming karinan dakal tau reng pupunta
Kilub na ning patingapun, kabuklat na ning masala
Dening tau a daratang, daratang lang alang sala
Kaku naman panabilin, kareni nang kakung anak
Nung atin mang manyad saup, ibuklat la retang palad
Ninu ya man ing dinatang, nanu ya man keang piblas
Arapan yang masalese, ating lugud neng mamarap
Anting metung a salamin kakarinan niting tau
Mayayakit ing sarili, potang iyang lalawan mu
Kakablas ya itang sala, mayayakit pangatau
Inia ika’ng babalikan keng ugaling pepakit mu
(Salamat kang Atseng lrma Navarro, my Pootee White )
July 22, 2023
