nang: PL Sergio Gramonte Calayag
Tutu kung menialupsupan, bakit kaya mipakanian?
Ing malagu tang kultura, ing kulturang kapampangan
Talasulat kawatasan, deng istoria at crissotan
Tutung misna king kalagad, inia iyang mipapanpan
Ila mu ring mipabustan, talagambul e sikasuan
Metamle ya at melungkut, ing kulturang agisingan
Deng mangasayang zarzuela, at mangasayang comidia
Kareng balen ampon baryu, ilang rening mamie saya
Kareng mete, ‘tin balasyun, pandakitan deng dalaga
Deng mangatikding lalaki, ila mu ring mamamunta
Ketang pialung la miyarap, pakibat da makarima
Bulaklakan ya ing pialung, magkamali ating prenda
Mangatimyas a arana kareng baryu iyang usu
Lalu nung ating dalaga magpakilala’ng baintau
Ing tigtigan alang tuknang, mikatipun lang memaryu
At nung masala ing bulan, mamialungan, mipagkuentu
Lalam na ning palpabewan, mamagduman deng akit mu
Kagalangan ing magbabo, mangasaya lang memaryu
Bakit ngeni nang miliari? bagya-bagya milalako
Ing malagu tang kultura, keting lalawigan tamu
Minaliwa’ng panugali, megi tutu nang moderno
Magkulangan yumung lugud karening kaparang tau
Ninu kayang migkulangan? mipaburen, e sikaso
Metung tamung kapampangan tatalakad ketang ustu
Kalupa kung kapampangan manalakaran ta sana
Kultura’t literatura kalingapan ipakit ya
E ta sana paintulutan, ing malakuan at mate ya
Iyang dapat tamung sesen, ing sinupan gambulan ya
Uling lipi tang malugud, keti balen tamung sinta
Lipi tamu ning komanggi, tutung liping Maharlika
Aku, kakung pagmadagul, tune metung kapampangan
Malugud ku keng kultura at amanu tamung menan
Literatura’t kultura kanaku yang lilingapan
E gulutan kapilan man, e paglibe kareng dayuan
Ining lipi kung dadalan, marangal ya penibatan
Tatalanga ing kanuan ku, aku. .. metung kapampangan
July 24, 2023