nang: PL Sergio G. Calayag
1) Nung ing bie mu e gamitan, ketang banal a parasan
Anti yang tanamang dutung, alang babie salilungan
Tutung ini pakiyarle, kareng dikut karin parang
Itang dikut mikilasun, tutung alang pakinabang
2) Nung dening kekang gagawan, atin samut kayabangan
Ini gawang pansarili, alang mayap a puntalan
Kapagnasan nung e ustu, tutung alang kapuntalan
Alang ganakang akakit, alang akit kabaldugan
3) Itang tune kabanalan, mapanyaup parang tau
Keng pangimut ampon gawa, ing kayapan yang akit mu
Papasiag ne’ng katuliran, keng sasambitlang amanu
E maimut o mangabiran, parejas keng pamagtratu
4) Maputi man o matuling, ing kule na niting balat
Alang makualta’t kalulu, pante-panteng makiyarap
Ala ring makapaigit, kabiasnan, leguang pigagap
Pangatau e igitan, nanu ya man kekang depat
5) Ing kapurian pansarili, potang ini yang mumuna
Pilublubang mapagmatas, tune ini ing nasa na
Taung mapagpakumbaba, ketang mayap ya masapsa
E lalawe keng kapurian, sarili na atin kusa
6) Ing taung atin marine, anting sumpa ing amanu
Tuparan na at tuparan, nung nanu man ing pengaku
Ing amanung sasambitlan, itabak mu na keng batu
Tune ini e kalinguan, masukad ya pangatau
7) Panaun e sasayangan, anting metung kayamanan
Uling ini yang lumabas, e mibalik, agyang dit’man
Anya nung e pakamalan, keng e ustu ya gamitan
Dumalan yang anting angin, e me akit ing puntalan
- Nung atin mang manalipit, dadamusak katuliran
Talakad ka’t ipaglualu, ninu la man deng kasalang
Ing matulid yang magbabo, e da buri’ng mipailalam
Malasakit na’t masabal, atsu kening baleng tibuan
Ing taung atin kabiasnan, maingat yang mangamanu
Nanu ya mang sasambitlan, isipan pang atlung ukdu
Nung lihim yang sasalikut, e ne sabian ‘gyang kaninu
Angga karin king kutkutan, sinupan ne’t e pabalu
Tala-usuk ing lalaki, keng asawa ampon anak
Iyang tutung matutuki, ketang ustung pamidapat
Mamie mayap alimbawa, kareng gawang misnang sampat
Kayang anak iyang tukian, ban mikabieng misnang ganap
E lalawan ing babai, anting metung a pialungan
Uling iya ing kadame, keng maskup man o kanawan
Luguran ya’t pakamalan, pati na ing keyang keinan
Ganakan me ing lndu mu, itang lndu mung ibatan
Nung e mu buring maliari, keng asawa ampon anak
Kareng keka ring kapatad, pati kareng kamag-anak
Igalang lang parang tau, katuliran e damusak
Uling nung keka ra gawan, e mu buri ing marapat
- Ing kamalan na ning tau, alayu keng panga-ari
Alayu keng tilus arung, at alayu kareng pari
Ala keng matas tungkulan, babo yatu akit keti
Tune wagas at tune mal, keng mayap nang panugali
Taung ‘tin metung salita, kipmuan puri at dangalan
Itang e manalipusta, manalipit keng kabiayan
Tutung biasa yang lumingap at atin ya ring panandam
Masabal na’t malasakit, keni balen tamung tibuan
10) Ilaganas ining aral, anting aldo king aslagan
Ining mal tang katimauan, ‘yang manaya keng balayan
Sabug ya’ng mayumung aslag, itang sayang alang tuknang
Kekang gigulang bie, pagal at pibatang kasakitan
Tune alang kasimpara, tutung e ra atumbasan
Nung deng sabla abitasa, ining lugud king balayan
At balu nang matupad la rening kayang katungkulan
Kaselesayan misulat, itang nasa ning Katipunan
Tutung e na pin mabura, kening baleng pakamalan