kanitang minuna, asna kang kasaya
e abakas keka, ing lupa ning lugma
kilub ning aldo’do, alang makasagka
nung nu’ mu ilulan, itang kekang tula.
potang kayabe me, anti kamong ari
at iya ing Reyna, da ring lakanbini
uling para keka, bukud ya ugali
anya ing lugud mu, keya me pinilmi.
manibat kanita, mesigla ka kule
ing aldo at bengi, ikwa mong pilibe
kekang pekilaban, lugud mung dalise
dapot misala ka’t, e keka dinake.
siguru e sapat, at e na akakit
inampang mung lugud ampon malasakit
ing keyang tiwala king tuksu at sitsit
king salang dipta’na, sikban mu ing pait.
Patawaran mu ku, nung paskil ke ini
king meging palad mu, nung bili ku keni
uling ing lugud mu, minuli man sawi
yang milyari keka, e mu ikang dili.
Inya sinulat ku, ban da mung abasa
retang pusung mayna, a kulang tiwala
piju ku ustu ne, ing kakung simbitla
ban e ne malawus, tumulu ing luwa.
Ining kakung kudtang.. gewa kung balabal
maka-ibie ya sa’ng.. gyang ditak mung aral
lakwas na karetang lulugud por takal
a layun magdulap pusu nang kabangal.
Pemili kung piesa at pena-limbawa
lalang nya ning isip at malyap kung diwa
at nung sakali man mituran kang bagya
panupaya mo nung keka la dinugpa.
* 07 Agosto 2020 *(neng Bagse Ning Kailugan)