nang: PL Sergio G. Calayag
Kanaku yang apansingan, ing kuaderno kung tatalnan
Ikit ko reng pakasulat, patungkul keng kaluguran
Balang metung ‘lang babasan, at nong santing kabaldugan
A-isip ku lang isulat, keng poesiang kipmuang leguan
Ining pamikaluguran e ya maragul a dake
Dapot misna king ulaga, maygit pa keng milyung bage
‘Yang sangkap a mayulaga, kening kekang pamibie-bie
Tune ini e asali, ‘tin neman ligayang tune
E mabibie dili-dili keti babo niting yatu,
Dening kekang parang tau, tune ilang kayabe mu.
Lalu na ing kaluguran, a parati keng siping mu
Yumung lugud a mitanam,at ing bungang misnang yumu
Dening kekang kaluguran, akasalubung kening bie
Ila reni detang babie, dakal kule keni nang bie
Pauli na nitang lugud, mapali lang mamantabe
Sasaya ya’t maging mayan, kabang ika ing maglakbe
Ining tune kaluguran, pasiknangan ing kekang lub
Iyang munang maniwala, kareng grasyang mipagkalub
Nung atin problemang datang, tune e naka ilumub
Bagkus ika na’ng sagipan, e na bustan ika’ng manyud
Kening pamikaluguran, kaladua mu yang aslagan
Yumung lugud ing magbabo, alang akit katakawan
Ali ya makasarili, ing kasopan iyang duduang
Makabuklat la reng palad, ing gamat na yang abutan
E ya man parating atyu, makasiping kekang lele
Dapot iya ing aligan, iyang tune mamantabe
Reyna ka keng panimanman, keng pusu yang mamalale
Sasamasan itang mali, ban e lunto makarine
Anya ilang panintunan, deng tapat a kaluguran
Keng maskup man o kanawan, tutung e na ka pin lakuan
E ya taksil o maglilu, pamingua ka nung kailangan
Anti ka mong mekakulkul makamal a kayamanan
