20 Setyembre 2023
1.
Nanu yá mang bage / ing ikua king pilit
E ne nabangnan ning / ninu mang migkamit
Uling ing tagumpeng / e dinalan sàkit
E munie ligayâ / keyang migkapilit.
2.
Kalupa ne warî / ning bungang tanaman
A meyagtal king e / na kapanaunan
Potang kana’ne ning / taung menanaman
E na alasa ing / pignasa’nang niaman.
3.
Dapot nung metua yá / at melulut king pun
Anti ring tenaman / king matabang gabun
Iyang menanaman / mangan yáng maratun
King yumu ning bungang / ustu king panaun.
4.
Kabas ne iti ning / meninap a sobrá
A e mibabatá / king pamanenayá
Anggiang e pá sapat / ing gewa náng obrá
Buri na mipuk ne / king pakirasa’ná.
5.
Makanyan yá kímut / ing lilung tagimpan
Mikakaluku yá / king keyang pagnasan
Lilele neng kusa / ing map a sukaran
E na bálâ nanu / man ing kararasan.
6.
Kasi e malino / aral ing diamantí
King idad nang alang / tutung acayantí
Ding bilang ding banua / ila ring mányabí
King kilatis na ning / akamta’nang purí.
7.
Uling ing panaun / yáng subuk a pandé
A mamalkus karing / magpakadalisé
Ilang mumukyat king / tuktuk ning tagumpé
Dapat deng lakbayan / ing kekaba’ning bié.
8.
King makanyan inya / agad yáng kukupas
Ing kinang ning galal / a e tune’t likas
Kasi pirâpál yâ / king palsu náng piblas
Kalupa ring murá / at tilbug mûng iyas.
Yng Bantulut A Siuala