(nung wari keng sastri)1) Angyang e ku mestru, o e tala-turu
Buri ko sa’ng dake, reng tiru da kaku
Dapot pauna ku, e ku Lauredu
At king pamangudta, maki-kiapus kumu.
2) Ing pamanatu ku, e na buring sabian
‘Na kung kapakialam, at tiktak kabiasnan
Dapot layun kumu, kareng sasalangsang
Ing e ku burianan, mayaus keng mangmang
3) Kanitang minuna, ku pamung susulat
Maralas ku naman, mangapaspas gamat
Payul da kanaku, ban e mabatibat
Gamitan mu itang, mapinu ya salat.
4) At nung imbut mo pang, mas lunto manayun
Tukian mo reng atin, ampon alang turung
Nung wari keng sastri, gumamit kang padrun
Ban e ya palipit, listun ing pantalun.
5) Reng silaba otsu, dosi’t disiseyis
Itamak mo bilang at e ka palabis
Mengari mo keng tren, karing keyang rilis
Lapat ya parulang, ban e la magpildis.
6) At nung sakali man, keya apalya ka
Dapat mung ganakan, ‘na kang kasustansya
At kareng aliwâ, angyang mapait ka
Dapot kareng bisa, maniaman ka lasa.
* 03 Oktubre 2022 *(neng WakaOjie Mangalindan Pena)