15 Junyo 2016
1.
Sagiwa pa ing milyari inyang king bie ku datang ka
Ketang muna ra kang akit diosa ka waring bat banwa
Makatiman meng kitang ing kakung lagiu nung nanu ya
Misda’naku mu’t mepipi king lawe ding kekang mata.
2.
Kanita ne megumpisang migbayu ing kulang kung bie
Ding balang aldo daratang miustu no’t mikakule
Ing king siping ku atiu ka, mebie kung mitmung tiwase
Minalale ing padurut, mesala ngan at mibage.
3.
Makanyan kung akukutang ot makananu mung balu
A king penandit a ita, mangailangan kung kasuyu
Uling kilub na ning pusu ating lukib a mebuu
A king ustung kaorasan dinatang ka at mengatmu.
4
E ku napin kalingwan pa inyang pepaslag me’ing aldo
King bie kung pane nang bengi, ‘la nang salang bisang matyo
Leko mu ing kabalisan at ing takut a magbabo
Peparatang mu ing salang malambat nang e na lalto.
5
Mekad bandi ing talagang keka buri kung sambitlan
E aldoldo ating diosang babasle king daralanan
Kalupa mu kening bie kung menatsu king kakulangan
E sapat ing sabian ku mung, labis dakang kaluguran.
Yng Bantulut A Siuala
San Simon