Saganan kong mitmung tapang ding alun a mangaragul,
king busal ning dayatmalat at king angin babalibul,
at king masikan a bagyu, mangildap man o manuldul,
malaus ku pang sumulung at e bitasang kumurul.
Nung kailangan dalakit ku kareng matas talimunduk,
o ing salunsunan ke pa ing pekasepu ning bunduk,
nung karin ke mu arasan ing tagumpe king pagsubuk,
kapilan man e ku murung king daklat ning pamipamuk.
Pablasa ing malilyari king salukuyan panaun,
ing Indu tamung amanu malalam ne pamagmalun,
king kayang kabilian ngeni, ditak ditak matatambun,
a mandulap pamanlingap bang king aun e mandatun.
Yaku, anting metung anak king Indu tamu lulugud,
nung metung ku kareng suli a mepili at mitubud,
isulung ke’t paglualu ing amanung makabukud,
bang king alun e mayanyud at e na akuang malumud.
Ika, nung Kapampangan ka, at tune mung pagmaragul,
ing Indu tamung amanu a keka mipaintungul,
kareng aliuang amanu e me bitasang paisaul,
at maging metung ka sana king Indu a makakaul.
Itamu ngan Kapampangan, a Kapampangan meyaus,
Ing Indu tamung amanu yang kekatamu mamaus,
king mangaina nang kabilian a uaring magmakalunus,
itamu ing magmasabal, at itamu ing mangabus.
E. P. D.
Nov. 22, 2023