Crusada: “Mangapampangan Tamu Keti Pampanga”
Kabalen,
Nung maragul la isaup deng magtinda kareng malls ampong shops keng ikasalba ning Amanu kapamilatan ning pamagsalita rang Kapampangan kareng daratang a manyali (pablasang iti yang sangkan ning pamanagalug da murin deng manyali), bakit ali tamu subukan dinan lang edukasyun at insentibu?
Mag-imprenta tamung papilitus at pangalat tala kareng malls a sasabing “Atiu tamu Pampanga, mangapampangan tamu”.
Bilang insentibu, magpalakad tamung mapilan a “mystery shoppers” balang aldo, at ing ninumang tinderang sinalubung mangapampangan dinan tayang premyung PHP500. Ninumang tinderang sinalubung mag-Tagalog, aduan tayang akasabi ing manedyer na at kutang tamu nung bakit managalug la reng tindera na.
Anunsiyu tamu iti kareng lokal a Diyaryu at Radyu, pati na posters at banderitas kareng balen-balen. Gamitan taya munaman ing poder na ning “text’ at pa-forward taya kareng anggang tau Pampanga ing “Atiu tamu Pampanga, mangapampangan tamu”.
Gawan tamu iti kilub ning atlung bulan, siguru naman tumimu ne ita kareng memalen tamu.
Ambag-ambagan tamung sablang malugud at sasabing “Kapampangan Ku”. Numanu tana mo keng “libu pesus” a ambag balang metung keng kasalba ning Amanu?
Nanung palague yu kabalen?
-Estong Sigua