Ining tatang Godyu pablasang matwa ne
Kusumisyun de ring kayang katubale
Uling linto sutil at ditak mung bage
Pane makabulyo’t e na buring mangye
Pelalung apu na mangilag na kaya
pasari ning tagle a kabuysitan na
neng e ra ne pansin binalak ning matwa
ing muli ne pamu king bale na Guagua
Inatad de ketang terminal ning Rabbit
a biyahing Menila ampon Marivelis
kalukluk na pamu tambing neng linapit
ing kondoktor ning bus ketang matwang buysit
“Nukarin ka tata?” a kitang nang agad
ning kondoktor kening matwa nang kayarap
nganang apung Godyung pabalang mekibat
“e muku akaket? mulalang damulag?”
“Ing buri kung sabyan ‘nu kayu pu munta?
ban ing kekong tiket gawan ku ne sana
ita ing kutang ku nandin keka tata”
Ngana ning kondoktor a mikakamas na
“King Golangco” ngana niting matwang sutil
“lagpus bagya kantu tulid ning puritil”
kabye na ning tiket kitang niting tambing
“magkanu ngana ing pamasahi karin?”
“Ot e ye lawan king tiket a binie ku? “
ngana ning kondoktor “king ban abalu yu”
pauli na niti mikamas yang ustu
ining matwang Godyu king memilosupu
“O makananu ke nganang akit keni?
ing alaga na ning kakung pamasahi
o pemusbus me neng pikbungan ning alti
makananu ke mong abasa kanini?”
Vhelle V. Garcia
June 16, 2013
Abu Dhabi, United Arab Emirates