Mala-Soneto
Irvin Harvey Rivera
Siuala Ning Maliwalu/Anac Ning Baculud
August 5, 2017
Nanung titiman da ring labi mu Bungsu?
Kabud mine la king tula’t memagluksu
O’bat king aske mu migbabo ing lagu?
Kabud ikit ku ing malegwan nang anyu.
Sisimpan mu wari ing lungkut mu’t tula
Karing kekang timan, karing talimaga?
Kabud awari ku’ing buri mung pawaga
‘Nyang misapwak ka king labwad a masala.
Buryan ku ma’t ali, dagul ka at dagul
Mangga na king e ra na ka pin akawul
Ing takut ku king bie ing kabud masawul
Istung mine naku king marimlang kulkul.
Inya, oh bungsu ku, sukat mung tandanan
Ikang babye kaku king tula at timan.