(Pugue para kareng Talaturu)
Irvin Harvey Estanislao Rivera
Siuala ning Maliwalu
October 1, 2018
Minunang gingkas mu kilub ning Iskwela
Mayumung amanu kenu ka mebyasa?
Ninu ing tinuru, keka e sinala?
Ala’t e aliwa nung al’wa ing mestra.
Bukud kang Ima mu a tutung malingap
Yang kadwa mung Ima a pane migagap
King mitmu nang belwan at king pamagsikap
Ayabut mu sana ing kekang Pangarap.
Ninung manatindi neng masyas ka buntuk
At neng lalabag ka ninung mamye usuk?
Ninung gabe keka at keka mengipuk
Bang mitulid ka king ugaling bugasuk?
Miyayaliwang belwan keka na dinake
Mayumung taguimpan keka inabut ne
Nung nu’ ka peinturu, mistulang miglakbe
Keka nang inampang at sukat nang binye.
Masampat nang payul anti la mong perlas
A kikinangkinang king masalang bukas
Anti la mong batwin keka na pekwintas
King pamaglakbe mu yang likwan nang bakas.
Inya, kekong Anak, sukat yung ukulan
Ding kekong Maestra sukat lang pugayan
Maragul dang saup at misna rang belwan
A meguing dake ra karing kekang disan.
Kareng sa’ng pengari pugayan do sana
Maragul dang ambag kareng ‘gang Anak da
Miguit pa king Guintu ing kaulaga ra
At meguing dake ra a anti mong Mestra.
E ta la pu sana pabreng mipakarok
King mali mung atul karin la milugmuk?
Pamagdisiplina e ta sa kakarok
Para karing Anak mayap a panusuk.
Karing meguing Mestra, babye ku ing pugue
Matas a respetu karela guingkas ke
Kapasalamatan ing kanakung babye
King meguing saup da’t karelang dinake.