Ibanya ke pu ini a isipan kung makapanaun ya keng paratang a Semana Santa at para na mu rin karetang e pa mekabasa pa.
Belangkas nang Apung Gusting
3/26/16
Riyadh KSA
I
“Ibpa, patawaran mu la, pablasang e ra balu ing daraptan da.”
Tutu yang malugud king tau I Jesus,
Pelalung kasalang imbut Nang ikabus;
Pepakit Na iti karen anggang Judius,
A linibak Kaya’t mipaku king kurus;
Pesakitan da Ne’t pepalasan lubus,
Peniad No pang tawad Ning sakdal tibubus;
Ing tinulung daya keng katawang tindus,
King meto sikluban oyta ing menatbus.
II
“Ngeni mu rin ituki daka king paraiso.”
Apusan ta’ sana ing gewa nang Dimas,
Ikwa nang migsisi king tawli nang oras;
Kabud inawad na keng Talapagligtas,
A ituki ne king paraiso’t itas,
Bistat man marawak ing kayang milabas,
Melinis ngan ita’t alang likwang bakas;
At ing pengaku na Ning nuan a Mesiyas,
Mídáun kang Dimas, mítás ya’t miligtas.
III
“Babae, oyan ing kekang anak…anak, oyan ing kekang Inang.”
At kening indu Na, saddiang malugud Ya;
E ne kabud likwan a alang ayuda;
Ba’nang aparamdam ing lugud ning inda,
Télaga Ne i Juan a maging anak na;
At ini namang Juan manibat kanita,
Lingapa’neng tutu ing Birhen Maria;
Karing labing-addua pablasang bungsu ya,
Ing gabe ning indu tutung kailanga’na.
IV
“Dios ko, Dios ko, O’t peimburisan muku?”
Makapagmulala ing guingkas Ning Kristu
Anti Ne mo uaring sisisyan ing Ginu;
King pamangutang Nang mengaring magtampu,
Ot pepaburen Neng kana’na ning lau;
Dapot ing sustansya ning Kayang amanu,
Pangadi ya king Dios at pamanigapu;
Kalupa ning anak a magparalampu,
At manyawad saup anting pásaklulu.
V
“Maua ku.”
E alak o danum ing Kayang kaylangan,
O nanu mang bage makasno akmulan;
Ing pamangaua Na kekata yang ulwan,
King dapat a mayap, at marok gulutan;
Palaganapan ing kasalpantayanan,
Karing sablang bangsa ning meto-sikluban;
Lugud parang tau… iyang pairalan,
At mipanatu tamung mitmung kapayapan.
VI
“Meyari na.”
At ing kamatayan, dintang keng Mengabus;
Ing bie Na king yatu mitda neng melaus;
E na buri sabyan, mete Ya king kurus,
Ala Yang apala keng bie Nang mepupus.
Ing pangamate Na, sinyalis ya’t signus,
Ning misyun Na yatu ganap ne at lubus;
At king sala tamu, ikwa ta’ng míkabyus,
Daya Nang tinulu, yang Kayang penatbus.
VII
“Ibpa, karen gamat mu panabilin ke ing kanakung ispiritu.”
Obat penayan Na ing tauling inaua,
Karin Na kilisak ing Kayang pigampa?
E Na wari balu ning Guinu ing lub Na,
O imbut Na naman ing damdaman ta Ya?
Aggguiaman ginapang king kaplas at dusa,
At ketang kurus Na, pinaku’t tindus pa;
E man meg-inakit king kalmang tinggap Na,
Anggang kamatayan sasalpantaya Ya!