Dinatang na misan , meinlab ku keka,
keni mu king peysbuk , mikilala kata ,
pane tang mipagchat , at mipag istorya,
anggiang keralasan , magpuyat ku uala.
Mika ugnayan ta , maygit king pabanua,
king makabang panaun , mesaya kung basta,
anten anten kupa , ing “off duty” muna,
ban maski ” video call ” , mikakit tamu pa.
Nanu man gagawan , itabili kuna ,
neng kukulayit ka ,panusignan daka,
masaya ku murin , akwa kung manaya,
maski keng “online” mu , karin ta mitupa.
Bala kumo sana , ika nang tagana,
ing akayabe ku , angga na king angga,
uling king umpisa , keka ku milsinta,
ing ‘gang pangarap ta , pisanmetung ta pa.
Misan kayaldawan , kabud migselus ka,
e ku balung sabyan , nang milyari keka,
ala mang batayan , inisplika kuna,
e ka pa manwala , pamilit mu’ing keka.
Karing kaluguran , uling ” magcomment ” la,
karetang pupost ku , at mipangomusta,
bala namu wari , pagselosan mu pa?
king e mu man balu , kamaganak ku la.
King pangapalyari , mikawani tana ,
ayus mu kanaku , ngaku naman keka,
“mekad dakala pang , kaku manenaya,
uli ing dapat mu …e kuna abata”.
Pero ‘bat makanyan , keng isip atyu ka ?
pilit man labanan, pusu magmalun ya,
metung kung babai, at mapanaguanta,
e murin alingad, misan maglua kupa.
Kakung yang pengarap , akayabe daka,
balu kumu naman , marayu’ ing distansya,
ing balang kimut ku, pabalu ku keka,
‘bat “facebook account”ku, buring kuanan mupa!
Maski na’ng gawan mu, e ke abye keka,
ining kakung password , kaku ya…e keka,
e mune babandyan ing sablang e keka,
linto ka ugali … ay makasnuk naka!
Ing kekong talasuyu:
Patria Bondoc David
ning Manlapig Capas Tarlac
19 ning Abril 2016