Masyadung maracal, la deng mamanata
Atin mamusan crus, atin macayagpa
Sugatan a gulut, atno pang karaya
Qng salang gewa da, macabawas caya?
Mapaliaring iti, amana qng nunu
Malyari mu namang, ibat biru biru
Nung nanu mang sangcan, mecad e ta balu
Atyu na carela, nung nanu ing tutu
Nung nanu ing sangkan, e tana cucutang
Balang malilyari, atin ngan ping sangcan
Atiu namu ita, qng miqui catauan
Paburen ta nala, ita ing caburian
Pero para cacu, masqui na magnacnac
Masqui quecang laman, acuang mangagabac
Nung caibat na niti, ing gawang marauac
Isundu mu murin, e naca sasabac
E na buring sabian, nung magpinitensya
Sablang casalanan, mipatawaran na
Ning ding utus ning Dios, queca pamintuan la
E mu na cailangang, manasaquit ca pa
Luguran mia mu sa, calupa mung tawu
E ca mangalunya, maging tapat ca mu
E ca macamate, e mangagrabyadu
Ing caulian niti, mayap cang ejemplu
Isipan mu abe, nanung dapat gawan?
Magpinitensya ca, o magpacabanal?
Ica na ing bala, isip mu gamitan
Atyu namu ita, casalpantayanan