nang: PL Sergio Gramonte Calayag
Potang mika-idad tana, mikikit tamung parati
Ketang lugal ta magkape, mipag-istoria at maili
Kareng bageng adalanan, at kasiran keni nang bie
Ibugnus ing sakit tang lub at sumbung ketang mikibandi
Mika-pilegis ne’ng lupa, at ing buak ta yang puputi
At kanita pagmulalan, panaung lebasan keti
Sake tayang babalikan, ing masaya tang pamibiebie
Pasalamat king Dios lbpa kening sabla yang pesari
Potang itang mengatua na, mikit tamu karin parke
Keng tanamang maniampaga, banua-banua yang dadake
Kasulu ka keng pamangan itamu ing abe-abe
Ganakan ta ing milabas at kaluguran kening bie
E tana pin isipan pa lebasan tang kayanakan
Pablasang yang ikit tamu, pamagbayu nang dadalan
Itang oras e tagalan, uli ini yang delanan
‘tin panaun keting yatu, ustung panaun yang datang
Inia ngeni matua ta na, mikit kata neng Domingo
Alas cuatrong gatpanapun, ketang kape ta mitagpo
Kipmuan yang kapagmulalan, adalanan keng bie tamo
Ala itang kapanisian, mikalugud kabang bie mo
Salamat Kang Donna Ashworth at Kang Elisse Macapagal