nang: PL Sergio Gramonte Calayag
I Atseng Evelyn (Figueroa), Angeles ya munta
Simba ya king Apu anting panata na
Tutu yang malagu at ne pang kaporma
Sake yang Pajero ini ing saken na
Karas na Abacan ilog yang miglapo
Dadagus ing lahar ibat Pinatubo
Meputut ing tete, sira yang akit mo
Dening dadalakit sasake lang Pajero
Ing sakeng Pajero iyang pupusanan
Deni nang lalaki, lahar ing lipatan
Keng pamamusan da, atin kaingatan
Pota iya’ng mitiab burak ing bagsakan
Akit deng mamusan, ilang magtampiso
Talasan ing lahar, mataram pang bato
Keng pangababad da, bitis manimusyo
Damusak keng burak ampon ining abo
Kalipat ning tau atin kabayaran
Keng ditak alaga ila reng abutan
At nung e ka bisa, talete keng kuayan
Saka mangulabe keta nang kuyabnan
Tutu king kasakit ing bieng adalanan
Keng dagus ning lahar manyira yang dalan
Malualas asikan ilang mitambunan
Dakal migkasakit, milako karinan,
Deng taung mituran ila reng linipat
Kareng resettlement anti mo king Dapdap
Kaligtasan keng bie iya ing pigagap
Keni nang miliari, maybug e atanggap
Panaun linabas tutung atin aral
Ketang kasakitan lugud ing mimiral
Ita nang kasaupan parati yang duduang
Lako keng sarili ita nang kaimutan
ccto:
