nang:. PL Sergio Gramonte Calayag
Kalagu mo kakung Reina, tune reinang parangalan
Ngening oras babandera, ining matimyas mung leguan
Dening ari ‘liwang bangsa ika ngeni’ng pagdulapan
Ban kanita iyang yampang regalo lang ‘tin kamalan
Matula kung tangalan ka, Ika ngeni’ng putunganan
Keti babo enteblado, babandera kekang leguan
Kekang lupa a mayamu, bibitbitan ing kamalan
Dagdag leguan iyang timan, kekang lupa makalulan
Kabang ika’ng pakalawan kakarug yang kakung salu
Tutung e ku mipaindatun balisa ya ining pusu
Panandaman ining sinta, anting aping mikaluku
Batu-balani ka wari, abitan me’ng kakung salu
Ining piyikan kung pusu, kabud ika’ng keang ikit
Mipalundag ya’t migising karatunan alang akit
Metamle ku panandaman anti ku waring masakit
Ing panulu ika Reina, kapaldanan yang mayakit
Ngening ika’ng meging Reina tatangalan dening tau
Dinan da kang mamalale, kabilangan aduang libu
Agyang ila e mo utus, ila reni deng mamintu
Ban kanita e ka magal, masese ya ing leguan mu
Ika’ng reinang kipmuang leguan anti ka mong mabie santa
Sablang tau a manakit, mikatula la reng lupa
Ining pusu rang melumbe, pasibayung mikabie ya
Ing leguan mung bibitbitan iyang magdalang pagasa
Kalagu mo, kakung reina, tutung misna king kalagu
Agyang dinan laksang gintu, e bisa nung ‘ka’ng dumayu
Keti babo ning sikluban, tatangalan ing leguan mu
Ika’ng Reinang sakdal kamal, keti babo niting yatu
Metung ya mung paganaka, kekang dangal yang ingatan
E pabustan yang masira o iya ing mirinatan
Kabud ini yang mesira at mabating ing kamalan
Gumaga ya ing pusu ku, pamagmalun yang damdaman