nang: PL Sergio Gramonte Calayag
Ing sinta ku keni nang bie, manibat ‘niang akilala
Yumung lugud e kinupas, kening bie na yang dadala
Sto. Niño Academy, pakamalan ming escuela
Keting lugal ke mitagmu, pamanyuyu megumpisa
Kening kekaming suyuan, manibat iniang magaral
Mengayari keng kolehiyo, kekeng lugud yang papabal
Tutung e ke memalagua, tutung e ke memirapal
Makaba man ing suyuan, e sinira ining dangal
Ating labing atlung banua ing suyuan e tinuknang
Memagobra at sinaupan ing pamilyang pakamalan
Dinatang na ing panaun, ketang altar mitanguanan
Iya ini ing sininup, saka iyang pekamalan
Ing panaun yang linabas mikabunga kaming anam
Telakad ya ing bandera, dakal amun ing erapan
Deng pagsubuk a dinatang, ila rening alagpusan
Mituklip la reni nang tud, ing Guinung Dios yang aligan
Maniwala kening sinta, ketang lugud na kanaku
Yumung lugud a malinis , iya ining asaksian ku
Inia naman yang pinili, meging kabangal ning pusu
Malugud ya keng pamilya, malugud yang parang tau
Kekeng lugud yang sinese ala ining kapagliluan,
Ketang maskup at manawa, mumuna ing katapatan
Pablasang ini nang sinta, iyang kakung pakamalan
Pasalamat king Guinung Dios, iya kaku nang pigkalam.
