Nang Josephine Luz De Leon-Pineda
May 13, 2023
Estropa: 7
Linya balang estropa:4
Rima: “a, t, e, -an”
Sukad: 10 Silaba
Atlung Dekada ampong kapitna
Tinggap ing grasya ibat king Ibpa
Milamnan ku at midinan upaya
Maging metung malugud a Ima.
Manibat kanita amanwan da
Deng ima tutung mapibabata
Mecad pati sarili kalingwan na
Idaun na ing kegana-gana.
“Isubu na ne mu ibie ne pa,”
Maralas ini sasambitlan da
Idaun ing makapagpatula
Tune ping makanyan ya i ima.
Potang ing anak ya nang masakit
E mipaindatun, anti mong murit
Dudurut-durut penapenandit
Ing karug nang Ima tutung migit.
Mapagal ya I Imang manyese
Kareng anak na at katubale
Lilingapan na deng bage-bage
Makatud ing iyang sulu ning bale.
Ima ko, migit ku nang antindyan
Ing bayat ning kekang daralanan
Daraun ing lugud kekami ngan
Ing lugud a alang kapupusan.
Pauli mu, ngeni balu ku na
Cabud makananu ing maging inda
Ngening metung naku namang ima
Ibie ing sulu, lugud at tula.
Panupaya ye pu nung eya makanita ka pulidu, malwat pung panaun anyang tauli kung sinulat poesia. Manigaral ku pung pasibayu at kukwang inspirasyun.