neng ORLY MANALO DIZON;
Orthografiang: C-K (ca,ke,ki,co,cu);
Sucad:6/6 (12 silaba);
May 7, 2016
1
Careng anggang Indâ / keti babo yatu
King kecong ca-aldon / cacu lang ibersu
Laman na ning diuâ / pasiag co kecayu
At parikil la king / map yung pangatau.
2.
Lugud na ning Indâ / e ya atauaran
Caticdo nang abac / angga nang cabengian,
Careng keang suli / ing bie na yayampang
Mantabe yang tune / a mipmung canuanan.
3.
Ganacan ta pa mu / bingut tang pelanggâ
Itang mapupuyat / kea bali alâ,
Meragul ta’t sucat / pelto nang masalâ
Lubus binie na ngan / lugud na ning Indâ.
4.
Dening pangamanu / a cacung lalatag
Keca cacung Ima / ing keca co pasiag,
Lugud a tiru mu / a cacu mu nambag
Kinauat lang lubus / a asmu king tatag.
5
Ngening matua na ca / maina na catauan
Acu bilang anac / dapat cung paramdam,
Matapat a lugud / anting ca-ablasan
Caretang lingap mung / a sarî canuanan.
6.
Tanggapan mu sa ing / gulisac cung matnî
Ban agiang ditac mu / keca co isublî,
Lugud a binie mu / alang pacunuarî
Bayu cu matudtud / cacu cang pangadî
7.
Aduan cu king Ginu / ing pacaban ca bie
Ilaut ca sa king / sablang tagulele,
Ampong igauad la / dening aduan tacde
At mapaling caul / padama cong pane.
8.
Potang maina na ca / ala nang sicanan
Ketang kecang ketuan / acu ing guyabnan,
Calupa na iniang / acung magpatalan
Ding adua mung gamat / cacu mu iyaduan.
May 14, 2023; DIZLAG FARM & RESORT.