Ala lang ulaga ring gintu at perlas
aggiang dit man deti e mo apiyabas,
qñg cayang ulagang ala nang catumbas
uli ning lugud nang dalise at uagas.
Pablasa ya ing bie a ibatan ning bie
a peparam ning Dios at caya miyabie,
qñg cayang upaya caring bie nang babie
careng balang anac a ngeni mabibie.
Ing sablang lingap na qñg cagling daralan,
at qñg cayang lugud a e atauaran,
maging sariling bie e na ganacan man
aggiang miras ya pa quetang camatayan.
Macanyan ing lugud ning Indu qñg anac
a manibatan qñg pusu nang busilac,
at ing cayang pusu ya ing tune lamac
ning metung a yanac queti yatu sipuac.
Paramdam tamu sa’ itang tune lugud
careng Indu tamung quecata’ lulugud,
uling queti yatu ila ring mitubud
at careng bie tamu ilang macabuclud.
Cabang mabie la pa ring Indu tamung mal;
paquit ta’ carela ila ring pecamal,
at qñg pusu tamu dinan ta’ lang lugal,
uling qñg bie tamu ila ring cabangal.
E. P. D.