nung ing kakung ukul iyang abasa mu,
o damdaman me mu buri ing pusu ku,
o nung aggiu ku sa’ng ‘yapse keng amanu,
ing buri ku sana, keni naka kaku,
mupin atin taling migagapus keka,
nung wari mo sana, atin nakang soga,
at ita ing bage a maging aguanta
ampo pang sasabi nung nu ka mu angga.
kening karinan ku, inia e ka miras…
aggiang mabisa ka e ka man mitalas,
uling ing kalidad ning tali mu, matas,
ing tibe sineriang misadsad king wakas.
pasayang ku pusu o ba’t ngeni ta pa’
misagana daklat king labuad ning tula,
inia bisa ku mang maging kang kaku sa’,
king uli ning tali, iti, e agawa.
ketang misan aldo, ing lub memialungan
keng layun usignan ining panamdaman,
ngaku, aku namu ing gawang paralan
ban e ne sunggabal ing tali mung iyan.
silaban ku nemu… patluran keng api
ban nakang makalag kaniang pangatali,
ita ing paralan a pekamasagli,
mu pin tututul ya ing lub uling mali.
07/02/23 //09:23
kaibat sinaling pandasal
***diwang indam kang PL Rodel
***12 silaba, 4 linia, 6/6 sesura