nang: PL Sergio Gramonte Calayag
Panakawan me pitaka ini nang metung a tau
Iya ining mangalulu kilub na ning paruminggu
Kaibat nita magobra ya, mikaperang pasibayu
Maging aral kening bie na, kanita e mangalulu
At nung anak iyang turu, maging metung talasulat
Iyang ining mangalulu, keting bie na ababakas
Dakal tutung mangabiasa, mabeluan man keng panyulat
Tune yang e a-iligan, pablasang yang alang bayad
Dapot dening talasulat, tune ini e lalawan
Makabalangkas lang kudta, kuntento ne keng gagawan
Tutung e ya pin mikualta, misadsad king kakaluluan
Datang neman ing panaun, deng sinulat pakamalan
Kalupa nitang Shakespeare, kayang gawa babasan pa
Meangubie a Gallardo, keang kudta gagale ra
Bayaning Gat Jose Rizal, sinulat na sinikap la
Ilang mamie tula’t saya, at kipmuan la king ulaga
Nung metung kang talasulat tutung e ka pin mikualta
Kalulu ka man kabilian, kening bie mu kuntentu na
Makasulat ka mung kudta, tutung ika’ng masaya na
E manintun tutung dakal, pamibiebie tayimik ka
Salamat Kang Comm. Lino L. Dizon