(Adle: AnakArenas)
Binubud lang butul ding tanam litsugas
Keng malating mula, timbakan a gradas
Tumpuk-tumpukan la, tinubung laganas.
Neng Sabadung abak, panlabas lang oras
Tutugtugan danum ban dagul miasamas
Pilan mung duminggu, pamupul no bulas.
Ding tanam kamatis tinubu lang sabe
Abe ding litsugas sinirut la lele
Agnan lang magambul tumubung masese.
Cabang daragul la sisilon lang pane
Potang titas nala, dirinan lang gabe
Ban e mangapakli ring suli rang tangke.
Keng berding salada, gamit lang madalas
Ding giling kamatis at bulung litugas
Panlaban keng bayat at prisyun a titas.
Bista’t atin naman alergic keng gule
Mangan mung kamatis keng karni penabe
At den mang litsugas panagdag lang kule.
2023.07.24
