Kapampangan Library

nang: PL Sergio Gramonte Calayag

Nabengi iyang abasa ing masanting nang istoria
Ing “Rudolph the red nose reindeer” metung yang pamaskung kanta
Agpang ya keng metung anak, salunan ing kabilian na
Masakit pa keang lma, ing lilingap keang tata

Pepakit ning keang tata itang lugud ampon lingap
Ala ining kapabustan keng pamilya yang pigagap
Ining tata a masipag, kukuentuan ne’ng kayang anak
Dening kuentung bungang isip, at saka na la susulat

Ining drowing keang kuentu, patungkul ya kening usa
Iyang atin kapansanan pikakailian deng abe na
I Santa Claus yang melunus, pesiknangan keang lub na
Ing arung nang misnang lare, keng dalumdum megamit ya

Keng dalumdum ning kabengian at panaun yang marimla
Ing arung usang Rudolph, mamie sala keng dalan da
Inia deni nang pialungan, a dadala nitang Santa
Ila rening midadala kareng anak maniad kaya

Ing istoria babalikan kening anak nang pakamalan
Inia iya ing sinulat, ban kanita e kelinguan
Kayabe la dening drowing at lalage keng sinupan
At pakit no rening drowing potang iyang mag-istorya

Misan atin lang pamitipun, Christmas party kening lugal
Dinake ne ing istoria, at ing bie nang delanan
Mete ya ing asawa na, itang lumbe panandaman
At ing lingap keang anak iya ini ing gagawan

Dinake ne at binasa ining istoriang megawa
Dening taung makirandam kayari na mengapalua
Papalakpak ‘lang patugut, ilang kipmuan ketang saya
Aburi de ing istoria bungang isip ya megawa

Ing istoria gewang kanta, aburi de rening malda
Menakitan milyung dolar, keng istoria yang mitala
Mibayu ing karelang bie pati anak yang metula
Pagasa ya keng pamilya iya ining memie sala

Misulat keti Daklan, Bokod, Benguet, Mt. Province
November 28, 2023