(dampul)
Kapampangan Dictionary: become like rag
Kabaldugan: lamutak
Gamit:
asnaku kaswelu ketang maglolo ka,
deng kaluguran man e la botu keka;
lupa kang mamulang at salbayi, ngara,
DAMULAN mya kanu ing pusu ku pota.
(“sale ning lugud” – tita bern)
metung yamu ing sangkan, e addua,
o’bat e mu agawa ing dapat
a balak-balakan mu nang maluat
a kekang daptan ing pamagtapat
ban ing pusu mipasno ne sa’:
ala kang tapang bitasa salu
inia e bisang sumubuk mu man,
alang iki king kapakibatan,
gererung e paman misugatnan
manglap neng agad king luang tumulu….
nung makanian aggiang pang balu ku
ing dagul ning yayampang mung lugud,
payalian daka malsintang matbud,
king bie man makanian ka siguru.
12/02/23 //23:05
kaibat minum panulu
(sonetong asyanu nang tita bern)
Potang mamuska ya keka’ing kapalaran
Sangkan nakang denan gyang e mu kailangan
Tuksuan naka pa at gawa yang paralan
Nung nu ka mibata, king keyang papusan.
At subukan naka ketang e mu balu,
Ituru ne keka, ing peka-buri mu
Lakwas na karetang sampaga pangulu
A anting kanangga ing ibie nang banglu.
Buri ke sa’ng bistan, ing keyang amanuan
King sampagang atyu libutad kakewan
Dapot nung masukal, ing keyang kabilyan
Lako ku ing suksuk king kakung dalanan.
Dapot kapalaran, nung keka misala
Agyang king paninap, keka ilisya na
Nung paninasan meng pilit ing e keka
Pota mamuli ka, kang mesirang Sisa.
Antimo keng komiks at alben ta’ng sine
Nasa ta’ keng bida, iyang magtagumpe
Dapot nung ing serye ning peka-finale
King tawling eksena, kayabe yang mate.
Anya ing kudta ku keni ku nya tikmus
Uli ning pluma kung..lua na e mamagus
E yu sa’ isipan ala neng ibugnus
Nya megdesisyun kung e kune belaus.
* 05 Disiembre 2023 *(neng WakaOjie Mangalindan Pena)
nang: PL Sergio Gramonte Calayag
Ing lugud ning lndu ketang kayang anak
Nung anti kalalam, tutung e asukad
Anti ketang dagat, tutu yang malualas
Karin babo banua, ing lawut amalas
Kilub siam a bulan ika ing dadala
Ketang kayang atian, tutung ingatan ka
Alang kapabustan, akakit mu kaya
Ika ing panayan anggang mibait ka
Potang kabait mu, sakit meyos na ngan
Saya ketang lupa, tune panandaman
Saka ka pasusuan ketang gatas nang mal
Manibat king pusu kipmuan king kamalan
Kabang pasusuan ka, lawe na maratna
Ketang kekang lupa tune e matatda
Saka ka apisan, kabang makakera
Papabal ing lugud tutung abitasa
Mayumu nang lugud, keng pusu manibat
Ika ing sesesen mayumu nang gatas
Pakamal na keka, iyang tutung matas
Bunga ka ning lugud, tune mung abakas
Malugud a lndu, tune lang bayani
Babo ning sikluban, nanu ya mang lipi
Mayumu rang lugud, atsu yang parati
E ya milalako, e ya malumpawi.
June 5, 2022
katutuan kareng dakal manatu,
ing sarili ing laman ning amanu,
mu pin iting bage e ra balu,
inia balaus lang mangamanu.
pablasang ing kabual karing mata
ing papampan king dapat akit sa’,
makapagmulalang ing puling da
ring aliwang mata asna sala.
kapamu, magsalamin ku sagli
pota akung laman ning sinabi,
atu nakung atu mo kunwari,
mas marusing ku pala sarili.
— kuyug, sopan mu kung maglalawe
— at talaru, ban e makarine.
Uari ku pu kakila tane i Garabidu e ya mu malino mata , matalino ya pa, pangaras keng diskusyun o piyakitan e me sambutan…
Misan karing kasabi nang Garabidu apisabyan da ing reliyun , sinabat yang tambing i Garabidu yaku balu kung magligtas kaku ing mamangan, mipatulala ding kasabi nang Garabidu kening simbitla na , obat naman ngara? Mekibat ya Garabidu e uari ngana, patse mamangan balamu mangadi ngara ding matua, biyasa ka tagana Garabidu mesambut ke kanyan ngara.. sinabat ya ing metung pilosopung kasabi ra, e bisang paysambut kang Garabidu, kaybat mung mengan mipatudtud naka makananu kang miligtas kanita? nganang mengutang…, , mekibat ya ing matalinung Garabidu mas lalu ka pang mukyat banwa , uling patye matudtud ka ala kang agawang kasalanan , e uari mukyat la banwa ding e makagawang kasalanan, migtas niya mu adwang gamat ing kasabi nang pilosopu…. yari ne pu
(neng tita bern)
lalon ku la nandin, mikakadurut la,
nung nanu-nanu na ing pamanyaptan da;
ating dakal kanan a anting magpyesta,
atin magmasusing anting bayung banwa.
pero nung kutnan no layun keng pintalan,
para-pareu mu ing layun sasabian
dapot nung lalon mo layun king inayan,
ing dapat aliwa layun a amanuan.
anti reng aliwang payatu kayanti,
nung nanu-nanu la pamanyaptan deni,
atin makatodu bosis neng sasabi,
atin makatodu sagakgak at ayli.
atin murin namang ing sisikasuan ra
itang pamikit dang mabilug pamilya,
inya ing pintalan ing keyang itsura
anti yang reyunyun kanyang daraptan da.
dapot atin naman mumuntang aliwa,
a ing sikasu ra ring pislag kandila,
a babagayan da keng pangading mayna
para keng inen da a mal dang meyala.
atin anak namang kandila sikasu
pero ing pangadi aliwa ya tonu
sana reng kandila mapudpud no kanu
ban akwa ra no lua, ngara rening loku.
deng aliwa naman kandila lang simpli
retang darala la at sinindyan ngeni,
dapot maralas lang punta punta keni,
e la manenayang bulan ning Nobyembri.
dakal a salamat ngarang magsalita,
mikit tana naman agyang mikit ta pa’
uling king pusu mi tutung e mi tula
ing misan pabanwa kari daka ‘yapa.
11/23/23 //06:02
kabang mamangan pansit luglug
***ka-40 pyesa
E pu mayan ing mamukpuk paku
Myaliwa la keng kasyas da buntuk
Lalu’t e ka karpinterung lutu
Sumawa kang matbat kakapulpuk.
Kareng paku myaliwa la klasi
Buntuk a magaspang o mapinu
Deng martilyung pamaku kareti
Akma la pamulpuk ampong pulu.
Atin pakung mayan ipakutkut
E manyayang sikan at panaun
Dapot atin detang mabubukut
Makatwag diskarti’t dispusisyun.
— Atin taung anting paku misan
— E magkusa nung e ya pukpukan.
nang: PL Sergio Gramonte Calayag
Pagumasdan ing bulaklak, keng malagu nang kabilian
Malangi ya ing paligid, alang basa, alang uran
Dapot iyang mamie saya, at leguan a tatangalan
Pagasa yang papakit na, sumangid ning kasakitan
Ining aral nang dadala, papabal na kareng tau
Keang leguan at sintingan, iyang tutung akakit mu
Mamie tula kaninu man, kabud iyang amasdan mu
Sampaga yang tatangalan, salingalngal keang banglu
Busal na ning kasakitan ing sampaga iyang lawan
Itang aral nang pawaga, keti babo ning sikluban
Potang iyang bubukadkad, ing pagasa yang dadalan
Keang banglu ababawu, tune mamie yang sikanan
Karas bengi ing sampaga, itang ambun sisingapan
Anting grasyang ibat king Dios, iya ining sasaluran
Dening tau king sikluban deng sampaga pakiapusan
Mamasa ya ketang grasya, king Dios lbpa manibatan
Inia metung paganaka, keting bie tang pakamalan
King Dios lbpang Mayupaya, iyang dapat tang aligan
Kaburian na iyang tukian, nanu ya man ing parasan
Keang lugud iyang pagpa, tutung e ka mipabustan
nang: PL Sergio Gramonte
Keti Daklan, Bokod, Benguet, kening babo kabundukan
Ikami rening maglakad lalam ning masalang bulan
Abe paring Somascano, ing dalumdum lalakaran
At kabang maglakad kami, aku ngeni’ng mamigunam
Agpang kareni nang pari, ing karela ku akutang
Ninu reng minunang pari, ilang keti memanyatang
Pekibat da kening kutang dening relihiyosong Belgian
Kening isip memialungan, saka aku’ng memigunam
Tutung matas at matarik ining babo kabundukan
Mikanlaut la reng lugal potang ilang pupuntalan
Tune zigzag pa ing dalan, at neng katas dudungdungan
Dening paring memanyatang kasakitan ing delanan
Inia ini nang panagkat ning Guinu tang Jesu-cristo
“pusanan me’ng kanakung krus, tuki ka kagulutan ku”
Deng tinuki kagulutan, e sinira ing pangaku
Kipmuang sakit ing delanan, kapibabatan akit mu
Akakit ku’t apilasa, ing bie na ning relihiyoso
Kening malaut a lugal potang ilang midistino
Kasakitan yang arapan, tutung ala ining luhu
Pupusanan ita nang krus, at tutuki la king Guinu
Inia ini nang bokasyon, awus yang ibat king Guinu
Nung iya ing pakibatan, kasaupan na yang aduan mu
Ban misadsad keng lakaran, ing parasan yang dasan mu
Manalig ka keng kasaupan, keang lugud a mayumu
