ABE-ABE NGENING BAYUNG BANUA

Posted on January 2, 2024 by inglibrarian

nang: PL Sergio Gramonte Calayag

Aduang libo aduang pulu’t atlu, payari na’ng banua
Ikami reng mititipun at kumpletu ing pamilya
Keng milabas mikanlaut, pauli na ning pandemia
Manalangin king Dios lbpa ing pandemia mayari na

Pemulat mi keng pamilya, salubungan bayung banua
Karas na ning alas dosi, makayarap ngan keng lamesa
Mitalanan kaming gamat, pasalamat iyampang ya
King Dios lbpang Mayupaya antabe na aduan kaya

At ngeni nang bayung banua, misyuneru iyang atsu
Malagad ya mung mumuli, malaut ya ing distinu
Penikuanan akayabe agyang oras saguli mu
Salubungan bayung banua ban iya ing akasulu

Metung kareng a-ugalian, bayu lungub bayung banua
Mamangogo ale ubi, iyampang ya keng bisita
Abe-abe itang sangkap maging metung ya mu lasa
Anti ya mo keng pamilya yumung lugud lalasan ya

Kabang mangogo keng ubi, ing kuentuan alang patad
Misyunero neng mumuli, tutung misna king kalagad
Semantalanan ing oras keng karelang pamiyarap
Akayabe kening bale, ining karelang kapatad

Bayung banua pagmasusian ing panga-indu nang Maria.
‘yang Ima ning Guinung Jesus, kabanalan atsu kaya
Inia keni nang pamilya kasaupan na aduan kaya
Ban ilapit keang anak, ampon king Dios lbpa banua

Posted in Kaugalian, PL Sergio Gramonte Calayag, Poesia, Poeta Laureado | Leave a comment

216

Posted on January 2, 2024 by inglibrarian

Paris lang katang-katang a bitis
Nung keng aske e agnan pibatan
Nanan mu man e la mipaparis
Ding balangkas kabud mikatawan.
E la patas nung seryang pilimpi
Metung medyu malpa metung duluk
Pitunggal lang matas at malati
Karing binyas punta anggang tampuk.
Na’ng sangkan kaya ning pamitambal
Deng adwang e bage mipareha
Mekad metung ding bakit a dakal
E agad ulata karing mata.
— Dakal bage patalas keng isip
— Babye kule keng bye keti sulip.

Posted in Poesia, Poeta Lakandiwa, Sonetu | Leave a comment

“pamaniagana king bayung banua”

Posted on January 2, 2024 by inglibrarian

katuklu ning bulan a laggiung “Kapitu”
bista man kasiam ya karing kalidariu,
pagsaddian da ne ngan kalupa ning pasku,
at layun saganan a magsayang ustu.

ngeni, meyari na ing pamanenaya
pablasang atiu ne ing panenayan da,
at king pamagkainge peniaganan da ya:
karing mangasikan akbung at musika.

peniaganan da yang inge mangasikan,
karing penakitang matulang silsulan,
ampo pa king anging laus lub dinatan,
ampo king matalik maldak a inuman.

makanian la alus daraptan ding sabla
neng king bayung banua ume sasagana…
e re aggiung lako ing pamagmasigla
aggiang ala no man mayap a akakua.

ing pamagmananu, daraptan ding tau
ngening miyapsa ne ining banua bayu;
bayung kapanayan a mibie keng yatu
a samantalan sa’ng gamitan king ustu.

bayu yang regalu ing dintang a banua;
pigkalub yang anti nitang kinlasan na,
at kalam yang binie mabilug pabanua;
panaun yang sapat ban milapit Keya..

kabang maniulsul lang pera ban magkainge,
aku, itang banua a mamun etad ke
a mitmu ya ing lub king tulang miniale,
kabang pasalamat king kaniti Minie,

at kabang atad ke ing banuang palako,
seganan ku neman ing banuang sisiro,
e keng inge, nun’e king tulang maglapo
kening kakung pusung pasalamat Babo.

01/01/24 //20:19
kaibat minapun

Posted in Capampangan Shakespeare, Kaugalian, PL Tuazon Sabandal, Poesia | Leave a comment

Ablas

Posted on December 7, 2023 by inglibrarian

06 Disyembri 2023 – 6:32 N.B.
Sonetu

King lambis mu bina kung megunâ
tutu meng apatulâ ing pusû
sumangid ning ating tinulung luâ
king kabiguang keya ku binubû.
Mesayâ kung labis at mataktak
king siping mu mutyang talipandas
balaku mo migit ka at palak
keyang, ing ligaya kakung limas.
Ngeni ing ablas king kakung depat
gilutan muku namang manangis
nung nanung gewa ku keyang tapat
aku naman ing kekang giyagis..
— Ngening ala naka, ala nayú
— ing mitagan…lungkut a masolú…


Yng Bantulut A Siualâ
San Simon

Posted in PL Apo Gonzales, Poesia, Poeta Laureado, Sonetu | Leave a comment

e sa 4

Posted on December 7, 2023 by inglibrarian

“niaman na naman ning bao”, ngara,
“babaung puad na ning litsung manuk
a asna kapali at bubusuk,
e bala ing makintal ka pambuk,
e me wari lapangan tagana?
kayi kanita ing pitsu na sa’
asne king kalaman a kalaman,
e me wari naman panapsalan,
magmap nung e me panggaligitan
at panusignan mu ing kekang tula?”
lawe-lawe ku e ku manakit,
at alang manuk a ababau,
e ku seriang mipabalikid ku,
seksi yang dalaga itang ikit.

12/06/23 //19:04
kauli ku bale
(sonetung Asyanu neng tita bern)

Posted in Asian Sonnet, Babai, Capampangan Shakespeare, PL Tuazon Sabandal, Poesia | Leave a comment

ING KABUD KUNG LUGUD

Posted on December 7, 2023 by inglibrarian

Diwang ibat king dalit a “Ang Tangi Kong Pag-ibig”.
02 October 2014 – 7:03 P.M.

1.
Ing kabud kung lugud a keka inampang
Iti e magbayu king kapilan pa man
At nung isipan mung e tune’ing pakamal
Sinta, mangga ya’iti king ke-alang anggan…

2.
E raka kalingwan uling ika’t ika
Ing dalung ning pusu, ning bie ku’t inawa
Kabang kening yatu ’tiu kung mangisnawa
Ika’ing luguran na ning kakung kaladwa.

3.
Lawen mu sa’ing kakung pibabatang lungkut
A kening pusu ku papate, durunut
Uli ning pakamal a kekang pigkaimut
Ngeni magdusa ku, king lugmang babalut.

4.
Dapot makanian man, bandi, ing sikli mu
Ika pa murin ing sinta na ning bie ku
Ing nung nu napun mu inatad mung yumu
Atdu naman ngeni ing pepaukuk mu.

5.
At ngening ding balang oras a gigiling
Tatangis la wari, kikyak at daraing
Anti ning ala ka king kanakung siping
Buryan ku na’ing mate, king banwa na sa’ingsing.

Yng Bantulut A Siuala
San Simon, Pampanga
Palmdale, California

Posted in Palsinta, PL Apo Gonzales, Poesia, Poeta Laureado | Leave a comment

e si 4

Posted on December 7, 2023 by inglibrarian

ninu ing sumabing e mabaya
ing mangalasi pusu king sinta,
istung ing kekong pisulung addua
gewa na na’ng dake ning napun na?
dakal ku mata a apamiga
uling e naku linto karela
iniang kaibat kung ikua ing sabla
-ing dangalan at pangatau ra.
maplas, balu ku, mabayang bina;
ing dunut pusu alang kapara;
misan, maibug mimin ing ganaka,
at susuatan pelalung ing banua.
abalu ko kaplas a delanan
king sariling panulung petakman.

12/06/23 //21:43
kabang manalbe Mech Cadet
(sonetung Italianu neng tita bern)

Posted in Capampangan Shakespeare, Italianu, PL Tuazon Sabandal, Poesia | Leave a comment

Magkwentu tamu pa!!!

Posted on December 7, 2023 by inglibrarian

Pisasabyan dening professionals, apisabyan ninu ing mas maragul asasaup keng balen, sabi ning metung karening mipamida ding mestra ilang mas importanti ngana, uling alalu makananu tamung mabiyasa dugtung na, e peysambut ing metung deng doctor ngana nung alalu den mengamate tana sana ngan pasalamat tamu kareng doctor ngana ! Aru dimdam ning bidang Garabidu ini , e tutu ngana , masikan a bosis pepaalyan na iti, mas mayap la pa deng judges kesa kareng Doctors ngana, mipamulala dening mipagkwentu , tsaka de kitnan i Garabidu, obat mayap noman deng judges ngada, makibat ya i Garabidu , itang kaluguran ku ngana, pepalawe ya keng doctor , kasasabi ning doctor adua namung bulan ing bie ning kaluguran ku , e na atanggap ning kaluguran ku ing taning binye ning Doctor , apagkapalian ne ing Doctor , ikwa neng apate, anyang miyatulan ya ngana ning Judge ketang kalaguran ku , Dinan dakang 3 life sentences ( 3×8 years) meglundag ya keng tula kaluguran ku , uling makabang bie binye ning judge kaya…,mipatangu nala mu dening kakwentu nang Garabidu …. yari ne pu…

Posted in Komidya, Kuwentu, Poeta Manolo dela Pena | Leave a comment

Awang

Posted on December 7, 2023 by inglibrarian

Makapalanta keng awang, ing ligayang makaumang.
Mayap a aldo pu kabalen.

Posted in Letratu, Pretty Lisa | Leave a comment

e sbb 1

Posted on December 7, 2023 by inglibrarian

o’bat mo pin kaya gagapang ka?
o’bat e ka tikdo at talakad?
e nakaman siguru matamad,
uling e ka makanian kanita.
nanu waring managuanta keka?
‘te mo dalpak reng bitis keng labuad?
tikdo ka, takbang ka at lumakad.
e mu isipang mua ya ing banua.
e Na ka perusan ning keng babo
nung miragsa ka man at misapa,
e Na tulang akit Na kang sasio,
nun’e mitakid ka mu pablasa
kareng kasingdulum a alino
a manakid munaman ing tula.

12/07/22 //07:05
kaibat minum kape
(sonetung Barrett-Browning neng tita bern)

Posted in B-Browning, Capampangan Shakespeare, PL Tuazon Sabandal, Poesia | Leave a comment