BENGING MATAMLE

Posted on January 3, 2024 by inglibrarian

22 Oktubre 2016 – 7:00 P.M.

1.
Istung bababa ne / at durulung mamun / ing aldong manyalé
Anti la mong uran / ding lua kung mamagus / king milalung lumbé
King pisngi ning bigang / uma’ning lulam a / keya mamalalé
Ing akakit ku ing / kabud mung larawang / kaku e miwalé.

2.
King malugma kung bie / ing taksil a napun / yang babye sikanan
Iyang panaplak ku / neng akmula’naku / nining kalungkutan
Anggia mang king salu / e mamin ing pait / na ning milabasan
Ika’t ika mu rin / ing sisitsit na ning / pusu kung sugatan.

3.
Map pa pin inyang e / ra ka pa liguran / pane kung masayâ
Alang liligalig / a kirut at pait / king mangmang kung diwâ
Ngeni ining bie ku / lubus yang migapus / king tali ning lugmâ
Manibat kanitang / likwan me ing pusung /daraya’t maliasâ.

4.
Nung inya istung ing / aldo magkambil ne / king tabing ning bengí
Atiu neng manyabi / ing lilung palsiming / manuksung paratí
Uling king panalbug / ning aldo lalto ya / ing napun a lilí
Inya tangis na’t lua / ing pânulu ku king / pamagdili-dilí.

Yng Bantulut A Siuala
U.S.A.

Posted in Mala-Sonetu, PL Apo Gonzales, Poesia, Poeta Laureado | Leave a comment

Alang Titulu

Posted on January 3, 2024 by inglibrarian

Kortina ding awang matuling mitatak
King kakung sikluban mibalut king pisak
Mepulang tagimpan king napung peninap
Sitsit ku king banua piping e makibat.

Bayu ne ing banua nanu ing manaya?
Kening kabilyan ku misalmak king dusa
Kaku mepanako terak ning ligaya
Dudurutang maskup king kudradung banua.

Matuang banua meko miras kapupusan
Kalame at ubi bisa kung apangan
Kesu at nilaga kakung peninasan
Dimut kung lamesa maymut a tagimpan.

‘Sumisi ku man at kumyak nang kumyak
Ala yang agawa ing sawi kung palad’.

Posted in Mala-Sonetu, Poesia, Poeta Herman Pablo | Leave a comment

“JOSE RIZAL’

Posted on January 3, 2024 by inglibrarian

(Acrostico)
Neng Herman Pablo

J ust not say “La mia Patria Adorada”
O‘ linugud tune king bangsa mung sinta
S egunsun mung alun na ning kekang damla
E ka mekiwaksi karing palamara.

R uruk yang matalus pluma mung menungkat
I niwi mung balean ning kekang panyulat
Zio Jose, mekipamuk kang alang kablad
Ausan dang bayani matampa”t marapat
L unetang patutu king dayang pinatak.

Posted in Makuyad, Parikil, Poesia, Poeta Herman Pablo | Leave a comment

Pasalamat at kayadwanan

Posted on January 3, 2024 by inglibrarian

Nang Herman Pablo

Atlung dalan anam ‘pulu’ t limang aldo masaugling dinalan
kelub na ning mayupaya bendisyun, lamak na”t kalam
uran ibat karin banua aslag ning aldo ‘lang tuknang
dudurut durut a yatu magpagalo king sikluban
ing angin ning pangisnawa kelub king balang lelangan
at king ambun na ning tula sinagana ing aluntian.

Ala lang tuknang mamagus taguling, sapa at ilug
saslag ya’ing aldo king abak king kabengian yang lalbug
dening mangakatas a pun kng mal nang gamat a miyubug
miyayaliwang tanaman king sikanan na pepasibut
ding animal king marangle king kakewan, sablang ayup
binang megawa’t melalang king bie ning tau sasaup.

Dios ibpa ming milalang kening gagalon ming labuad
ikaming ngeni duruku keka babye pasalamat
kalam, lamak at bendisyun pabanwa namang milabas
kasaupan yu ampong lukub karing bagyus mangalapad
bayung banwang datang lukuban yu eganang miyanak
ikayung maging sikanan pangambil mi at kalasag.

Tawli pang kayadwanan, lingguayi ning kekeng bangsa
e ya sa maging mapayit karing suli at pelangga
maging mayumu’t mayubu karing asbuk ra at dila
karing mag adbokasya, ding amanu e ro sa pamye menila
talaturu ‘t talausuk mika kababan sang kusa
amanu ming kapampangan sumulung ne’t misaplala.

At kekaming tala gale, mituburan tala sulat
mirinan keng sikanan lub manyapat keng bage mayap
kamtan pu sa ing pakamal, masalusu keng pung gunyat
pamangailangan ning labuad magsilbi ke sang matapat
karing sablang makalijim ing pluma ming mibulalag
kabiasnan yu O’Guinu, karing kawatasan mi sumlag…..

Posted in Pangadi, Poesia, Poeta Herman Pablo | Leave a comment

Ing Pamanyagana

Posted on January 2, 2024 by inglibrarian

Ngening paintungul ya ing banwang siniro
Keng pangatuklip na ning banuang melaso
Itang likwang bakas ning menyalimpapo
Linabas mung misan sakildap ning babo
Alanang melakwan dit mu mang alino.

Ing mengapalyari ume munang lakwan
Bakas nang mepupus king yatung karinan
Tula’t lumbe man sa linabas mung misan
King takbang na ning bie king mengalabasan
Saguiwa mung likwan Potang gaganakan.

Deng aral a ikwa guintu lang meukit
King bie mung lekaran napun ning penandit
Nanu mang pagsubuk palsiming meyakit
King bie mung milabas minie pamanabit
Keng paintungulan mung dit man emu akit.

Nung wari’t mesubuk king kekang lekaran
Dakal a pasakit antimong dinatang
Dakal la munaman ding tulang temasan
Kalam a pigkalub ning nuan a Miglalang
Wari’t mabyasa kang lingus at mamilang.

Uling keti yatu king sulip mung lakwan
Ing balang dapat mu ating kayatulan
Dinapat kang mayap nung ing diptananan
Ena balung balikdan dapot ting kabangal
Yang bala ing Guinu ketang kayablasan.

King pamanando mu king bukas a sinlag
Emu kakalingwan ing napun a pigpag
Lawen mu ing paintungul mitmu king pamunag
Salang babatyo na ning sinirong saslag
A sakri king tula at misna king tindag.

Pabustan mu ing napun lumbug malumpawi
Kambe ning tula na ampong ing palsimi
Basta ing maulaga at mas importanti
Atyu ing sikanan inawang pakabsi
King bie mu king yatu mitmu king pasari.

Banuang makasiro king pangakung bukas
Saganan daka pin a mitmu king lakas
Dapot ing matulid keka katumbalas
Ing tulang manaya king pangakung piblas
Nitang Mayupaya potang ing king miras.

Masaplalang aldo na ning bayung banua
Dos mil beinti kuwatru 2024
Saganan karing bie a mitmu king tula
Kalam ka ping tutu.
Neng EMS

Disyembri 29, 2023
Tarlac City

Posted in Kaugalian, Poesia, Poeta Bishop Elorde Sambat | Leave a comment

Mali

Posted on January 2, 2024 by inglibrarian

30 Disyembre 2016 – 430 P.M.
Mala-sonetu

1.
Tandanan tálá ring / agawa tâ’ng malî
ban keta e ta na / miuman magkamalî;
uling ding kamalian / a e ta sâ burî
babie lang sálâ king / isip a e ganî..

2.
E ta pa’ikulung king / e ustung agawâ
kayabe iti king / pamanintun kalmâ.
Nung e karing malî / tamu king samulâ
e tâ mabiasa at / mituntun a diwâ.

3.
Dapot e ta sana / king malî pa’isane
a king isip tamu / ya na ing magpane;
nung kasing padaig / tamu at pabande
lubus yang miyungle / ing kabud tamung bie.

4.
Kuma ta sá’ng aral / king banuang magbayu,
ibayu ta ne ing / “matuang pangatau”.

Yng Bantulut A Siuala
California, U.S.A

Posted in Bie, Mala-Sonetu, PL Apo Gonzales, Poesia, Poeta Laureado | Leave a comment

PAKAMALAN KUNG O-SEI-SAN

Posted on January 2, 2024 by inglibrarian

(lng pamipaglolo nang Jose Rizal at O-Sei-San)
nang: PL Sergio Gramonte Calayag KOR

Kaluguran kung O-Sei-San

Ing pusu ku’t panalala, ilang likuan bangsang Japan
At balu ku kakung lakuan, itang lumbe’t kalungkutan
Ing gaga mu aldo’t bengi, e ku agyu mang bayaran
Ing kanakung pamaglako, tune ‘ lang kapatawaran

Tutung kaluguran daka ping lubusan
Ini tutung-tutu, o pakamalang O-Sei-San
Dapot sadyang pemialungan ining kapalaran
Aku ini ing mamili, nung ing pusu o ing balayan
Anggat sana pin maliari, e daka buri mang lakuan

Dapot iyang manenaya, sintang baleng pakamalan
Masakit para kanaku, ika ini iyang lakuan
Agyang anti ya kasakit, kipmuang tiagang pagpilitan
Ing lugud ku baleng tibuan, e ke maliari mang gulutan
Patawad kanakung sinta, pakamalang kung O-Sei-San

Dapot ‘yang pakatandanan, tutung e ka akalinguan
Anting aldo a malutu, bibitbitan ing mung leguan
Ating paling panandaman, iyang kipmuan king sikanan
Anti la mo keng bulaklak, ilang uman kekang timan

King pusu sasalingalngal, angga ketang kamatayan
Sayonara,sayonara, o sinta kung pakamalan.
(Akin tong isinalin sa lengguwaheng kapampangan,
Minamahal kung O-Sei-San,

Mula sa panulat ni Rado Gatchalian, KOR
Knights of Rizal, Northern Sydney chapter Autralia)

Posted in Parikil, PL Sergio Gramonte Calayag, Poesia, Poeta Laureado | Leave a comment

Adobung Kapampangan

Posted on January 2, 2024 by inglibrarian


https://www.facebook.com/reel/330411239877768

Posted in Pamangan, Poetisa Patria Bondoc David, Video | Leave a comment

“pablasang mas mayap”

Posted on January 2, 2024 by inglibrarian 
   (neng tita bern)

digpan ne ning tula ampong pigsalayan
ing kanakung pusu ampong pilubluban
uling mirugpa la kaniang kekang leguan
ding telatau na niting panimanman.

kaibat ning milalung penamdaman tula,
misapin pa iti king iwi ning kalma
uling king salu ku agad yang mipunla
at mitanam sintang king “wa” mu menikua.

tikman ku ing yumu king pamiraup da
ring kekatang palad king laggiu ning sinta,
anggang atupan tang miraraup nala
king pali ning lugud ding labi ta pala,

at kaibat, ing kalma menusig yang lalu
iniang salab na la king lugud ding pusu,
at king pangasalab atupan ta namu
a meralas katang miraraup salu.

dapot ing lugud ta mengari king kanta
mika kapupusan at mituldikan ya,
miyalilan salpak ing dating yumu na
pauli ning kalmang memiru kekata.

pablasang ing kalma a mipunlang tula
keni king pusu kung gewa nang taldawa,
iya muring kalma at alang aliwa
ing memupul king luang bunga ning paliasa;

pepaglapawan neng lugud ing pusu ku
ampong dinuyan na king lugud mu kaku,
dapot ikit na’tang asna kung kusuelu
inia kinua na ka kakung pasibayu.

dapot ing lua ku man gisan nang apiga,
salamat pa muring maragul king kalma,
ngara pin, “mas mayap milsinta’t meyala
kesa keng e tikman ing sinta bitasa”.

12/30/23 //23:11
kabang magkape kapitangan bengi

Posted in Capampangan Shakespeare, PL Tuazon Sabandal, Poesia | Leave a comment

Bayung Banuá

Posted on January 2, 2024 by inglibrarian

31 Disyembri 2014
16 silaba, 8-8 sesura, 4 a telatag, 9 a estropa

1.
Bulung ne namang mayagtal / king tangke na ning panaun
ing banuang minye sibukan / a ngeni kekata mamun
nung king malalam mang aun / karin ya dugpa’t midaun
king amlat da ring kaladua, / mìsulat ngan, e milulun.

2.
Balamu warî napun mù / inyang mibayu ya’ing banuá
ngeni atiu ne naman king / makatakdang anggana’ná
kalupa ra detang banuang / linabas king yatu digpá
dakal la ring miumpisang / obrang ali meyari pá.

3.
Keni ta dapat malikid / karing aldo mengaralan
ban talang akit ding bage / a e mirinan kayarian
kanita king banuang datang / pasibayu lang umpisan
ding mîumpisan a mayap / a buri tang pakiarian.

4.
Antimurin, king panyatang / ning datang a banuang bayú
atin tang pangakung bayu, / munye kule king bie tamú
mekad pamanyapat ya’iting / mayap karing parang taú
o kaya king sariling bie / atin tang buring ibayú.

5.
Ating obrang mayayari, / atin mu naman ping alî
anggiang nanu pa ing gawang / panaplit at pamiraglî.
Makanian yang kikimut ing / ka’isipang e kakawanî
king kaladwa at katawan / a bisa nang bisang mulî.

6.
Ding obrang tutung marakal / a king lelangan mipabal
ila ring obra nang pará / king sariling tutu nang mal;
ding ugalî nang pipigil / king keyang pamagpabanal
ilang dapat nang arapan, / gawan, ariang mitmung samal.

7.
Inya ring aldo at bengi / layun lang pikawani Ná
ning Linalang keti sulip, / pati king matas a banuá,
ban keta atakda tayá / ing gawan ta king umpisá
angga king panyatang na ning / oras a ayari ta yá.

8.
Ating napun, ating ngeni, / atin muring aldo bukas
ba tamung mabiasang kimut, / e na kabud mu maliswas;
mabiasa tamu king siklu / ring panaun a lalabas
ban ketâ agamit tayang / mitmung sampat iting oras.

9.
Ing gulung na ning panaun / daragusgus yang pasubung
ing lumâ ume neng mamun / ketang gulut ne durulung,
ban ketâ ita nang bayung / banuang saslag ing sumulung
munye bayung kapanayan / karelang makisalilung.

MASAPLALANG BAYUNG BANWA PU KEKAYU NGAN, KABALEN
KAPAMPANGAN.

Yng Bantulut A Siualâ
California, U.S.A
San Simon

Posted in Kaugalian, PL Apo Gonzales, Poesia, Poeta Laureado, Uncategorized | Leave a comment