Kapampangan Library

Neng Orly Manalo Dizon

1
Dacal lang babai, cacung akilala
Dapot ing laue cu, macayaliua ca;
E mu ketang lagu, acakit ding mata
Nune king ugaling, sasalamin keca.

2
Muna tang pamikit, a anting pitabnû
E lubus auari, nang linub king salû;
Ing bigla cung dimdam, cablas na king pusû
A nung nanung sangcan, iti e cu balû.

3
Micacunu cu man, linapit cu keca
Agiang e marapat, ‘tang akilala ca;
Uli na nita nang, itsura cang diosa
Abe ding angeles, a kinuldas banua.

4
Manibat canita, canacu mibubû
A ausan dang lugud, king salu tinubû;
Lugud yang dalise, tinarac ning paslû
Nang Aring Cupidu, kening cacung pusû.

5
Dalise cung nasa, king pusu manibat
Linapit cu keca, at dinuang ding gamat;
At binye mung sucli, mayumung pakibat
Malugud mung tinggap, palad ta milapat.

6
Mabilis lang meco, lacad ding panaun
Aldo, bulan, banua, cacu meki-agum;
Busilac cung sinta, lalu pang linabung
King angga na ketang, pusu ta migmetung.

7
O casampat pala, itang atin sinta
Ing pakiramdam mu, ing atiu ca banua;
At cauangis uari, metung a aguila
King babo ning biga, lilibad, magbiba.

8
Iniang marap ta na, king altar ning Ginu
Para miyaptas la, pusu mu’t pusu cu;
Lugud cung masapsap, iti keca ya mu
ICA MU ING SINTA, at e cu magbayu.

DIZLAG FARM, REST HOUSE & SWIMMING POOL;
Nov 2, 2022.

neng Orly Manalo Dizon

1
Ing’gang matatangal binang macapinac
Na niting Amanu king keang pagsalbat,
Ing pangisnaua na malalam na’ng saldac
King pangasunde na maibug neng mibatbat.

2
Obat miras kea ing calmang macanian?
King mismung labuad na de iting puersahan,
Ipapalbug pilit ban lubus miliuan
E na masambitla layun macalinguan.

3
E macalingad ding miayaliuang bage
King Salitang Mana babie tagulele,
Dacal nong pamilya ding mitutubale
Kilub ning aldoldo e da ne’ti yapse.

4
Antimurin itang meracal nong binâ
Meinganyung tucnang at lubus micaldâ,
King labuad nang lugal deti migdatilâ
Uaring lasun la ding bitbit dang salitâ.

5
Ua man nung e ta la alisyan ing alben
Ding programang tv a e dapat tunggen,
Mananu na sanang e ta ya paburen
Ing Amanung Sabi mangailangan sesen.

6
Caring cayanacan pasa ta carela
Metung a culturang tutung mauĺaga,
PangaCapampangan iya itang marca
King angga na potang king aun mitomba.

7
Lacan cabalenan a dapat magmandu
King pamanatili ning mal tang Amanu,
Sulung ya ing Sabi comersyu’t publicu
Iyang dapat denan oras at sicasu.

8
Ngeni na ing oras at sicasung aduan
Na niting Amanu king keang cabilian,
Gumunyat ta ngan sa kecata yang biayan
MAGUINGALUNG BILI ning Amanung Sisuan.

DIZLAG FARM, REST HOUSE & SWIMMING POOL;
Nov 5, 2022.

neng ORLY MANALO DIZON
Orthografiang: C-K (ca,ke,ki,co, cu);
Sucad: labingadua (6/6);
April 22, 2018

1
Cacung atingiran king bandang parobâ
Pangabalangcas na ning metung a cudtâ
Sangcap nang amanu lubid lang salitâ
Ampong sinucung king cundiman ning diuâ.

2
Picudtang king yubu E CU LA ISTILU
Uling masalpac la king lasa cu’t tonu,
Apin e co giyam ding lira na’t bersu
Lipat ning catutuan ing mamola ca mu.

3
Ninung maniuala managtal cang batuin
Tsaca pakuintas king sintang atna hinhin,
Cacu malambat nong pinaid ning angin
Uling king tutung bie e la sasalamin.

4
Atin pa ita nang magpaitas ya babo
Lampasan ne’ng biga king pamaniulapo,
Caring ing pluma na gulis ne’t ipalto
Lirang magpanyud king aslag na ning aldo.

5
O casampat na pin sunis king balugbug
Inia itang pusu melacas ya cabug,
Uling itang sinta bisa nang tumabug
Uanis ne ning aldo a ume nang lumbug.

6
Ing metung a uatas e mu makikiapus
Sake’t magpanyud king lacas na ning agus,
Dapat mica-atin yang istilung lubus
Yang marca ding cudta a keang tatacmus.

7
King nanu man bage atin lang tuntunan
A dapat lang denan masusing cabaluan,
Pero e na cabud kecang yang burianan
Uling gamit ne ning uatas mung irugan.

8
Ing tutu na niti bie ta babo yatu
E tamu asabi ini ya ing ustu,
Uling itang napun ala ne’t migducmu
King lungo ning ucul da ding balang tau.

DIZLAG FARM, REST HOUSE & SWIMMING POOL;
Oct 31, 2022.

Neng ORLY MANALO DIZON
Sucad: 8/8;
Orthograpiang: ca, ke, ki, co, cu (C-K);
Nov. 9, 2019.

1
Ing magtinda king palengki / e ya iti birung obra
Uling tictac pa caranun / ding keraclan matudtud pa,
Malisuas ne iting ticdo / at tincupan ding gamit na
Ban agad nong apagsilbian / ding suki nang manenaya.

2
Ing palengki iya’ng lugal / piniling nang pipagobran
A nung nu mu ngan akit ding / miayaliuang calacalan,
Sablang buri na ning tau / maca-ugne keng pamangan
Bucud alang aliua pa / ing palengki ya’ng pagsadian.

3
Asan danum lang tinda na / a pacaratuc pang timba
Kisokiso’t lulungdag pa / uling mecua la taldua,
Macatiman nong cucutnan / cambe laue nang maratnaa
Ding suki nang bisang sali / a mataba nang tilapia.

4
Pacagrupu la mu naman / macatocang pilming lugal
Dening magtinda capangan / ing aske da e papagal,
Singalngal pa nitang bau / lutung paugtuan at amusal
Ampo pa’tang pagmirienda / at tsaca ‘tang pagminindal.

5
Aliua la naman lugal / deni nang magtinda palta
Tinda ra’tang panpalasa / a mura mu caring bulsa,
Ila retang mikibalu / sangcap na ning “crispy” pata
Ing pitaca e ne dapat / sactu la mu retang barya.

6
E la micacanlaut ding / magtindang prutas at gule
Ding magtinda linyadu la / king kimut da at panaske,
Pacasacu dong babagsac / at pilpil pa ketang lele
Tsaca pacarga na potang / cailangan na lang iyase.

7
King palengki mu la akit / mapilan obra ning tau
Atin detang tagabitbit / libe sican ding camau,
Bibecut da itang bayat / king pago ra macasalu
Ban atin la’ting auli / caring barya deting sueldu.

8
Sabadu ya itang aldo / a nung nu la mungan akit
Magtindang gamit-cusina / at tsinelas-sapin bitis,
Inya nung ‘tin cang caracal / gamit-bale o tarapal
Ume na ca king pelengki / at e na sa paitigagal.

DIZLAGFARM, RESTHOUSE & SWIMMINGPOOL, Oct. 22, 2022.