DIWANG MALYAP

Posted on June 21, 2022 by inglibrarian

Mala-Soneto
Irvin Harvey Rivera

Siuala Ning Maliwalu/Anac Ning Baculud
Nanung ginulis na ning kanakung pinsil?
Pamanagimpan ya”t metung pamagbitkil;
kapanandaman yang e bisang matagkil;

king diwa kung malyap a e ku asupil.
Nanung susulat na ning kanakung pluma?
Ing Malungkut kung bie,– malugmang istorya;
king ba’yang milikas king metung a tema;
a pilit pasulat ning pusu’t kaladwa.

Ining dadalit ku lawiwi ya wari?
Malungkut yang kanta ning pusu kung sawi;
nung nu’ ko pawaga ring pita ku’t buri;
nung nu’ la migmula, nung nu’ la meyari.

Gugulis, susulat, at dadalit naku…
malyap ya pa mu ring dakpan ing diwa ku?

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

🍀 Mayubung Kausukan ☘️

Posted on June 20, 2022 by inglibrarian

Nukarin man ati yu ing bie…🌱
Luguran ya’t lingapan bayu ya miwale.💚
🍃 melanie24abril2022 🍃

Posted in Poetisa Melanie Cunanan Naguit | Leave a comment

TUNE ULAGA

Posted on June 20, 2022 by inglibrarian

Makuyad A Poesya
Irvin Harvey E. Rivera
Tagak Ning Sampernandu
April 5, 2020

Misan king bie tamu magnasa ta’ng bina
A sana datang na ing malagung kalma
King kapagnasan ta’ng mandulap himala
Ing bagueng masampat, mumuli king ala.

King babo lamesa atin nang pamangan,
O’t manintun ka pang e mu agyung kanan?
Atin na kang papag sukat mung pagkeran,
Maintun ka pang kutsung mabuleng tudturan.

Ing e na akawul ning kekang pigagap
Sukat nang isakwil at matulang tanggap
Uling nanu man ing kekang akakapkap
Yang tune ligaya mung e muling paninap.

Sukat a malawut e yabut ning gamat,
O’t yang pakyabutan a atmu na kalwat?
E mo sa’ masanting nung keka mong atyat,
King agyu nang dasan ning gamat mung panat?

E mo wari mayap ing milup kang sabo
Bang mipaldan ka king kekang pamaniglo
Nung mapali ka man king bandi mung silyo,
Matula kang mamun a kikisokiso.

At kanita, ing bie—-akit mung ligaya
Matampang kalma ning megui nang bunga
Kanita akit mu ing tune ulaga,
King pamandulap mu king malagung kalma.

TagakNingSampernandu

Posted in Poeta Irvin Harvey Rivera | Leave a comment

“ING TATANG A MAGCAS”

Posted on June 20, 2022 by inglibrarian

Neng Orly Manalo Dizon,

1
Iya ing pamuntuc / ning carinan bale
At padre pamilya / ing kea miugne,
Iya itang asias / a misna king tibe
Ampong sandalan ding / keang catubale.

2
Tucnangan nang bale / iya ing pecapun
Mitoca caya ing / sablang obligasyun,
A yatbanan na king / kilub patingapun
At caring pago na / deti ilang amun.

3
Magmunag pa’ng abac / malisuas neng ticdo
Tsaca na piragling / gauan itang lumo,(gaui)
Tingcupan gamit king / obra’t tsaca maco
King ban e mirasnan / pali nitang aldo.

4
Pangaras na obra / ala yang isipan
Nune ding pamilya / a keang bibiayan,
Uling balu na’tang / iya ing guyabnan
At kea akit ing / gauang cabanalan.

5
Balu nang sanacan / nung nu ya magbili?
Denan bie marangal / ding asaua’t sapni,
Inia anggang binit / lilisyan na’ing pali
Nitang panagcat ning / ligayang piragli.

6
King pamakipagtau / mapinu ya asal
King pamagsalita / e ya mamirapal,
Uari’t sa king batis / malino yang bucal
King aske na’t datang / cambe ing pacamal.

7
Cayabe na bale / pante keang laue
E ya mangabiran / amanu nang yapse,
Ing canita pa man / ilang keang tagle
A marubdub yampang / caring catubale.

8
Atin yang prinsipyu / a kea abacas
A papalto caring / amanung nang gagcas,
Ampo geua na king / panaun milabas
‘Nia bustan ausan yang / ING TATANG A MAGCAS.

June 17, 2017, Bahrain. Repost, DIZLAG FARM, June 19, 2022

Posted in PL Orly M Dizon, Poeta Laureado | Leave a comment

Mangapampangan Tamu – serye

Posted on June 13, 2022 by inglibrarian

Dumingguan a serye, para keng ikapanatili ning kekatang Amanung Sisuan.

https://kapampanganlibrary.whereishome.info/wp-content/uploads/2022/06/Mangapampangan-Tamu-Blg1.pdf

Posted in Anac Ning Arenas | Leave a comment

CASEBIAN 5:22

Posted on June 7, 2022 by inglibrarian

Ing taung maroc masisilu ya caring sarili nang dapat, at micuculaput ya caring silu ning sarili nang casalanan.

DIZLAG FARM, June 6, 2022

Posted in PL Orly M Dizon, Poeta Laureado | Leave a comment

CASEBIAN 3:3-3:4

Posted on June 7, 2022 by inglibrarian

3:3
E mu tatabiling bitasa ing catapatan lub at tapat a lugud: isulud mong anting cuintas king batal mu, isulat mo king cabubusalan ning kecang pusu.

3:4 Nung iti daptan mu, manakit cang calam at tagumpe king arapan ning Dios at ding tau.

DIZLAG FARM, June 3, 2022.

Posted in PL Orly M Dizon, Poeta Laureado | Leave a comment

CASEBIAN 12:1

Posted on June 7, 2022 by inglibrarian

Ing taung malugud king disiplina, malugud ya king beluan.
Ing mangmang casaman na ing paniabianan neng magcamali ya.

DIZLAG FARM, April 2/22

Posted in PL Orly M Dizon, Poeta Laureado | Leave a comment

KATIMAWAN AT KABAYANYAN

Posted on June 7, 2022 by inglibrarian

Irvin Harvey Rivera
Siuala Ning Maliwalu/AnacNingBaculud
June 11, 2017

Mitimawa ya wari ing Balen a e makasabi;
nung bulag ya’t e manakit, magmalun ya king sarili;
mamandulap ya king dulum, kilung deng magdilidili;
anting metung a daralit, susulagpo pati-pati.

Maging timawa ya wari nung ing asbuk misumpalan;
adwang gamat makatali gewa rakang tawan-tawan;
memanyupil la king balen, minyabug lang kalaraman;
pemaluktut da ing sabla ring memanyupil a daywan.

Anti mo ring kayanakan a anak nang Apung Rizal;
ampo ring Kabalen tamung e abilang na king dakal;
e la migkulang pangimut, mikyabe lang tagal-tagal;
karing minyupil a dayu, mitakutan? e sumbagal.

Samantala’ing katimawan a karelang pigluwalu;
dakal lang mibubu daya at ing lugud da milalu;
king balen karelang tibwan, king balen da ngan sinuyu;
e bala ing mangamate, e paysupil karing dayu.

Dinukit kaselasayan gulisak ning katimawan;
pelalu na karing amlat mesulat ing kabayanyan;
dakal sukat pagmapuri, e ta’ dapat kakalingwan;
meging timawa ia’ing Balen, migbusal ing KATIMAWAN.

SiualaNingMaliwalu #AnacNingBaculud

Posted in Poesia, Poeta Irvin Harvey Rivera | Leave a comment

ING BALITA (FAKE NEWS)

Posted on June 7, 2022 by inglibrarian

Mala-Soneto
Irvin Harvey Rivera
Siuala Ning Maliwalu/Anac Ning Baculud
June 3, 2018

Matang macabuclat, macasarang diua;
Yan ing meguing alcus qng pamamalita
O’bat casampat nang memulaclac dila
Cararagli nacu mu ping apanuala?

Babandu na canu ing tune catutuan;
Alang samut dinat, diria’t calaraman
Ustung balang ume iang manalumpacan
Mipapatangu la ring malda’t mangasdan.

Balu neng cululan ing maroc qng maiap;
Agiu nang isimpan, agiu nang atacap
Balu mung balu ing nasa na’t pigagap
Ing guluan no isip ding maldang magdulap.

Ing balita canu malapad ia pacpac;
Anti iang masamiu’t mabanglung bulaclac.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment