AKU

Posted on June 1, 2022 by inglibrarian

Macuiad A Poesia
Irvin Harvey Rivera
Siuala Ning Maliwalu/Anac Ning Baculud
Published and Copyrighted May 25, 2018©

Karing kasalang ku, e ku papaysupil
E ku gumamit man o talan mang baril
Atin kung mataram a plumang akambil,
At atin kung dilang e purul at garil.

Babayat ku misan a lub magsalita
Istung pisasabyan ing bie kung maluka
Nanu mong akwa kung masampat a diwa
Nung paimburis ku king marok dang nasa.

Peka kayap kayap mu nang anting Guinu
Lunto at lunto yang kasalang mung diablu
Dapot mimingat ka karetang mayumu,
Masampat a dalit king lambis ra’t tonu.

E ku kapagnasan at e ku babalak,
Baltangan ding marok a bakas dang dilpak
Aku itang taung paypagal neng abak
Gugusal neng bengi katakup ning pisak.

Kakaluguran ke ing ka’kung sarili
Aku mung bukud nang panwalan na niti
E na ku lalakwan king punta’t sikoti
Nu’ ke man miparas, kayabe keng pilmi.

AKU at AKU pin ala nang aliwa,
Atin kung pamisip manibat samula
Balu ku ing ustung amanu’t salita
Nung nanu ing mayap at marok a gawa.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

Bagiung Ompong (DEJA VU)

Posted on May 29, 2022 by inglibrarian

Mala-Sonetu
Irvin Harvey Rivera
Siuala Ning Maliwalu/Anac Ning Baculud
September 15, 2018

Macacsing a duldul, mataram a quildap,
Ding sulu qng bale, ‘ti la andap-andap
Bubiung itang angin at macapangaclac
Macanian iang dintang ing bagiu qng pisac.

“O’ian na’ing delubio” ngarang pamalita,
Mitacpan ia’ing Banua’t misimpan ing sala
“Manampil na ca iu”, ngacung minialita
Ba’tanang painaua, qng dase magquera.

Milabas ing oras, menabu ing uran
Caiagnan ning anging bubiung a masican
Qng oras a ita e cu amalaian,
Migbalic ing tacut cu qng milabasan.

Megui cung sacsi ning metung a delubiu
Sinaguiua ia ing tacut pasibaiu.

SiualaNingMaliwalu #AnacNingBaculud.

Posted in Poeta Irvin Harvey Rivera | Leave a comment

Casebian 29:21

Posted on May 23, 2022 by inglibrarian


Posted in PL Orly M Dizon, Poeta Laureado | Leave a comment

SONETO RA RING MAINDREDUS

Posted on May 23, 2022 by inglibrarian

Mala-Soneto (Capusungan)
Irvin Harvey Rivera
Siuala Ning Maliwalu/Anac Ning Baculud
November 15, 2018

Pikatyang balita a pitayi-tayi
Malugud dang yampang, tutu ping masali
Abak pang maranun ume nong mulayi
Libutad ning dalan mikalat piragli.

Kwentu mung Kutseru pikabakaba ra
Anti waring sermun ning Pari king misa?
Magi na king impun na ning resa-resa
Mangga na king sepu, balu ra’ing storya.

Makuleng istorya menasa pikatya,
Anti waring sineng dakal a ginaga ?
Mingat kang gigingkas, kawatan me’ing dila
At nung e ka bisang bale mu sumala.

Batu man king banwa ume yang manabu
Nung mituran ka man, “Juice ko” pakalulu.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

E NA MANUSIG PA

Posted on May 20, 2022 by inglibrarian

Makuyad a Poesya
Irvin Harvey E. Rivera
Siuala Ning Maliwalu/Anac Ning Baculud
May 20, 2020

King busal ning kakung pamigunamgunam kabang makakera
Aukulan ku mu ing bie ku kabas yang pupus a kandila
Kabang ing pabelu kukuyad, diritak, mababalag sarya
Kanita ku na ya atangalan ing bie binigu ning kalma.

Ding kakaluguran atyu king gulut ku king aldong kanawan
Kabud gilutan da’t sikwil dang mayap sangkang mengalingwan
Bista ma’t kanita pengakwanan dakung mangga king sukdulan
King tula na ning bie, metung kaming bangka, manggang kasakitan.

Dapot ngening bigu’t malulugmang bina king parusa ning bie
Kanita la linto ring tagle rang kulul king karelang aske
Ding sadyang matimang mangayumung labing inablas da’t dinake
King pisngi kung mau a menayang muma kaku’t mekamate.
Ngeni, magpaldas ku, lubus mangulilang migsaldak king bigu
Agyang misan na mu, tabak ku king batu agyang pilan ukdu.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

IGUT NA NING GABUN

Posted on May 20, 2022 by inglibrarian

Diuang puntong Paganaca neng ORLY MANALO DIZON

1
Musig at ali ca / iti ya ing tutû
Catauan ning tau / mistula yang abû,
King tauli nang siguc / mate ya’t mamaû
Magbalic king gabun/ at caring mibacû.

2
Ing tau metacmus / ya ketang catumpuc
A gabun mitipun / ‘bat king alicabuc,
Micalma yang miden / cabiasnan lumuruc
At mintinding agad / king balang pagsubuc.

3
Ing pamaglalang ning / Ginu king ‘gang sablâ
Ing tau bucud mung / dinen nang upayâ,
Pekilupa Kea / bisbasan neng diuâ
Ban yatung tucnangan / ya ing manibalâ.

4
Pero nang pagmatas / ning keang sarili?
Nung mismung keang bie / e ne bandi iti,
Itang anggang buri / e iti maliari.
Uling ing bie keti / e ya permanenti.

5
Macanian ya itang / carampatan surian
Ing Ginu tang Ibpa / ot alang angganan?,
Ginauad king tau / bilang caparusan
Cabang mabibie ya / keti king cababan.

6
E caya uli ning / dacal lang macasnuc
A magbiasa-biasa / ampong maindredus,
Aliuang macualta / sacdal no man caimut
Manyalpac lang usuc / ampong mamusabus.

7
Itang gagauan pa / nung sanu ‘tang baual
Sinasa’t micalda / pane makipagcal,
Malating gutgutan / daya da bubucal
Ugali’t kimut lang / lasip a animal.

8
Mecalinguan no ring / tiru da ding napun
Paindu tang macatua / a suging pecapun,
“Taung e picabiang / batas ning panaun
Kea masican ing / IGUT NA NING GABUN”.

Repost: May 20/22, DIZLAG FARM

Posted in PL Orly M Dizon, Poeta Laureado | Leave a comment

SALUNAN KUNG PUSU

Posted on May 17, 2022 by inglibrarian

Irvin Harvey Rivera
Siuala Ning Maliwalu/Anac Ning Baculud
October 25, 2019

E ku tantung balu’t milsinta ku keka
Agyang balu ku nang atin na kang sinta
‘Nyang minuna ra kang ikit, akilala
Kabud da na kamu pilsintang tagana…

Pablasa pin yata king tagle mung legwan
‘Nya e ku mibatang palsintan dakang nuan
Babayi ka waring bildug ning katasan
At pakiwari ku D’yosa kang sasamban?

Karing ‘gang Babayi aliwa kang dili
A akilala ku king kilub ning klasi
Agyang pang balu ku king ka’kung sarili
Malsinta ka ka’ku? Yan pin e malyari.

Uli na pin mekad king kekang ganaka
Ing mabaldug ku lub keka e mu gampa
Nanan ku mang lisyan ing malyap a kalma
Sarya nang sisigi king lagyu ning tula.

Neng lumapit na ka galgal na ku intud
Sumpung na ku dine’t mipawas na kabud
E ku balu bakit mitmu ku kakatbud
Neng ing kekang lawe kanaku ya mitud?

E ku mamin a lub nung malsinta na ku
Ala kung aguinkas nanu mang Amanu
Neng akakit daka king Iskwela tamu
Akutang ku na mu anta makananu?

Nu kaya mangga ing kasalpantayanan
Nung pita ning Pusu yang kakung pabustan
Mibata ku kaya at e panaligan
Tibubus kung lugud lele ku’t isimpan?

Dapot pilatan man banwa ya at gabun
Agyang kapilanman e malyaring m’yagum
Dapot nung paintungul ning pamikatagun
Ibye kung matampa ing mayap kung layun.

Pamikandayu ta gabun ya ma’t banwa
Yan e ku na sikasu, yan e na mawlaga
Bugtung ku man a bie bukud kalibe na
Dimla na king aun magui nang bangkala.

Imbutan ning pusu palad mang masawi
At yang kabigwan ing kaku a mag-ari
‘Gyang danasan ku man lungkut at palsimi
Salunan kung pusu abye ke sa’ buri.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

NANU PA ‘TA

Posted on May 17, 2022 by inglibrarian

(Panagulele’t sukal a lub)
Mala-Soneto
Irvin Harvey E. Rivera
Siuala Ning Maliwalu/Anac Ning Baculud
May 9, 2019

Mayumu’t mapayit king kilub tinubu
Itang sukal a lub metakmus king salu
Agyang nanung yampang at pilit panaru
Ing suksuk king salu, e mabugtu-bugtu.

Manibat Anak ku ing e ku pa tikman
Ing kawul ning Indung kanakung ibatan
Pablasang king kau, king lugud at ayan
Ikwa nang mitanam king ka’kung kaisipan.

Ing matampang lugud bayu maguing ganap
Sukat ya pang mibye at sukat matanggap
Ninu kayang Anak ing e na mandulap
King lugud ning Indu at ning keyang lingap?

Ngeni, matwa na ku, atin nang pamilya
Kasakit na pala nung ala nang matwa?

SiualaNingMaliwalu #AnacNingBaculud

Posted in Poesia, Poeta Irvin Harvey Rivera | Leave a comment

BABAI CANG TALIPANDAS

Posted on May 16, 2022 by inglibrarian

diuang capalsintan neng ORLY MANALO DIZON
Sucad: 8/8; Orthografiang: C-K; Jun. 23, 2017.

1
Mirikilan nong oras ding / bage king bie ta miliari
Alang ditman paginakit / a simbitla dening labi,
Dapot bucud ining pusu / a pilit e cucumpormi
Uling e lubus tanggap ing / pagsalbat na ning sarili.

2
Bubulayan cu pa detang / masayang aldo pisulû
A malalam pangatarac / king calamnan nining pusû,
Panaun nia itang matul / king sakit caplas ning salû
Ing agad sang mitulducan / ya’ng aduan cu’t panigapû.

3
Sasanacan cong parati / ding pangacung keca napse
Itang lumaut cu keca / potang ing bie cu ume ne,
Ketang aun a malalam / ning pagsalbat ya’ng cayabe
Uling iya ing angganan / na ning bie cung misnang lumbe.

4
Pero miayo pa mu rin ing / kening lub cu ing labanan
A e magpatumbalag king / lagiu na ning capalsintan,
Uling ya ing babie cacu / a maritac pang sicanan
At ya iting maulaga / tauling ibie ning catutuan.

5
Dilang mialiua sasabian / e cu no deti picabiang
Atin nang cacu sasabi / uari na cung malilipang,
Uling ing cacung pagnasan / magbalic ca mal cung irang
Iti ya ing capanayan / capilan ca caya datang?

6
Tagulele na keca ning / pusung saui king ligaya
E cu tinap-tinapan ing / gumulut ca ‘lang parsala,
Nanu mu ing casangcanan / ot memandal ca’t merimla
Sumangid na ning cabaluan / a pasumpa-sumpa ca pa.

7
Ing sa’ aganaca mu pa / detang bage pebandi mu
Macabale la king pusu / kinubut co deting ustu,
Lalu na’tang pebuclat mung / pasbul pisni na ning yatu
Uling yang pecaselyadu / nitang lugud mu canacu.

8
At detang pamicatagun / irug king bie ta milabas
Mipmung lang tula at saya / ing canacu mu pemalas,
Ding yumu da ding labi mu / at leguan mung misnang timias
E cu atanggap ing ica / BABAI CANG TALIPANDAS.

Repost: DIZLAG FARM, May 12/22.

Posted in PL Orly M Dizon, Poeta Laureado | Leave a comment

CA-ALDON DING INDA

Posted on May 16, 2022 by inglibrarian

Bersu neng ORLY MANALO DIZON;
Orthografiang: C-K; Sucad:6/6; May 7, 2016

1
Careng anggang Inda / keti babo yatu
Yatad ke ing puge / at yapse kecayu,
Ngening ca-aldon yu / cacu lang ibersu
A parikil ketang / map yung pangatau.

2.
Lingap na ning Inda / e ta atauaran
Careng keang suli (anac) / ing bie na yayampang,
Manibatan abac / angga nang cabengian
Mantabe yang tune / a mipmung canuanan.

3.
Balican ta pa mu / bingut tang pelangâ
Pane yang magpuyat / e iti painauâ,
Meragul ta’t sucat / pelto nang masalâ
Lubus binie na ing / lugud na ning Indâ.

4.
Ngeni mong matua ne / maina na catauan
Ita mung penganac / dapat yang luguran,
E ta na mimisip / nung iti capilan?
Ngeni na ing dapat / ing lingap paramdam.

5.
Dening pangamanu / king babo linatag
Keca, cacung Ima / ing keca co pasiag,
Lugud a tiru mu / king pusu mitatatac
Lub ning pangatau / mikintal, tinasac.

6.
Tanggapan mu sana / gulisac cung matnî
Ban agiang ditac mu / keca co isublî,
Lugud a binie mu / alang pacunuarî
King aldo at bengi / cacu cang pangadî

7.
Aduan cu king Ginu / ing pacaban ca bie
Ban ing keca pakit / ablas cung dalise,
Ing keca co yampang / dening aduan tacde
At mapaling caul / padama cong pane.

8.
Potang maina na ca / ala nang sicanan
Ketang kecang ketuan / acu ing guyabnan,
Calupa na iniang / acung magpatalan
Ding adua mung gamat / cacu mu iyaduan.

Posted in PL Orly M Dizon, Poeta Laureado | Leave a comment