Kapampangan Library

Mignasa yang linibutad karing tatanam marangle
Dinamput karing sinabud agyang e byasang gumile
Anggang mabagal yang lakbang pekikuanan nang milele
Uling meyama nang ikit ing masayang pamiabe
Mekisugu ya’t mek’yagum megaral yang makibage
E ya meynip e melambat karing turu da mipande

Daka’la ring migtas kile inyang keya na nang bignus
Itang anggang abalu na e da ayabut atarus
Keta kanung palsuneru mebisang piutus-utus
Ban potang dadara nala makirake ketang unus
Pati pinulut nang pale ikwa king pamamalusbus
Ginuyud da king libluban lislas de’ing saku at bilus

Peganan da’ing pangabrusku sebatan de ing lakbangan
Pituya-tuya de pa pin ketang kayang pupusanan
A metung kaban a sepu, igu, bitse at pinuman
Sera de’ing pidadalanan karing masuksuk a kwayan
Dapot e ya peysira lub piglako na itang arang
King takut e ya peysukung maragul la man katawan

Angga ngeni e tinuknang durulung ketang marangle
Sasaup yang mamanulip, sasarul ampon manaswe
Maglinis karetang lawas at makyabe mamatangwe
Mandaras karing pilapil e na iti pikarine
Gagawan nang laus king lub e king galal o king pugue
Susukdan nemu’ing sarili nung nu ya angga katibe

Babaing Matun 11/24/15

Nanu ya’ing kabiasnan? ipagmayabang ya? Ali ya kapatad!
Inya taimik ka, bustan mo reng tau, ilang keka sukad
Itang tune biasa, e ya magparagas, e ya palpibulad
Karing kabadbaran, lalaban yang patas, e paypaling agad,
Ding kayang amanu, mapinu’t masampat, yapse nong banayad…

Ding tune mabelwan, e detang matas lub, e bisang paysambut
Malualas la isip, itang panwala da, e makabaluktut
Panuyatan da pa, ing anggang katutuan, at kaybat la kimut
Kanita manawang, akwa ing kaburyan, ban e la masambut
Karing kapate da, e la benggatibu’t lalaban pagulut.

Ing matas a belwan, e ya magmayangin o magsasamais
E ya sasalingku, lalagpas, tatalpak ketang ating gulis
Biasa yang taluki karing ustung dalan at e tatalilis
Karetang tuntunan a makamatulid ampon makasunis
Kanita malagwang kamtan ing paninap, payapa’t mabilis

Nya keka amun ku, pakit mung biasa ka, lugud kang kasalang
Marap king prublema, lako’ing kapanyiran, e ka sasalangsang
Nung ditak nang bage, manupaya naka’t e na gagalanggang
Karing ma’p a dapat, manantabe ka at keka lang igalang
Ban detang kayagum matula la keka’t ing GUINUNG miglalang

Babaing Matun 11/13/15

October 18, 2015 · Lambac, Philippines

Tumangis ka kayanakan tangisan mu ing pagmalun
Ing gewa mung kamalyan king mengalabas a panaun,
Aminan mung migmali ka ketang dalan mung teluntun
Inya ing lwang mababalag bustan mung dilig king gabun.

Kumyak ka pin kayanakan ..sige! awa.. galeung ka!
E mu agwantang dumagus ing lwa karing kekang mata
Ing Pagmalun at pagsalbat, bustan mung kayang idala
Kaybat niyan mipasno ka ing isip mu lumualas ya.

Potang akabyusan mu yan milako na’ing alingongo
Ing dalan mu sumala ya’t ing bukas keka sisiro,
Sagakgak kang maglimayun king katasan magparayo
Pakikwanan meng atalan peka-matas mung talindo.

King labul na nitang bagyu marap kang mitmung tetagan
E mu isipan gugulut busal na ning ‘kasakitan,
Nung mali ya itang dalan a minuna mung biltangan
Yan ing gawan mung tuklwanan ing tagumpe ba mung dasan.

Sige ika kayanakan tumangis kang anggang binit…
Ing lwa ning pamanagumpe keka ngeni manyalitsit
Karing lupang kayanakan maka-atna mung ipakit..
Tintunan mung dalan ngeni ustu ya at makaigit.

Kayanakan apusan mu ing gagawa’na ning banwa
Lalaganap na ing grasya neng mag-lwa yang anti ika…
Ika naman ing gawan mu ustung ika tatatangis ka
Talanan me’ing kekang pluma, milala kang bersu’t rima.

BABAING MATUN 10/18/15