Tibu – Saudi Boy

Posted on October 25, 2021 by inglibrarian


Overseas Filipino Worker ya i Tibu king Saudi. Bayu ya pang datang keng obra na. Ing mamanewan nang makinarya pangulkul yang gabun keng lele ning dagat. Minta ya keng Saudi ba ya kanung makatipun pagumpisa keng kayang pamakiasawa. Balu mu na, panggastus keng kasal, pampatalakad bale, panyaling kotsi. Aba, marakal-dakal a pera ing kailangan nang Tibu para atangka na ngan ing buri nang itangka.

Karatang nang Tibu keng Saudi, mumunang aldo, dela re keng ospital para medikal tsekap. Pepainum de kanung aduang tabletas bayu de inumpisan tsekapan. Kitang na nung para nanu la reng tabletas. Sabi na ning magpainum a lulupang tau India, basta inuman ne mu. Standard procedure, ngana kanu ning Indian. Ininum na neman bang kanita ala nang pisasabyan pang malambat.

Kaibat nang me-medikal tsekap tiglus da ne keng obra na i Tibu. Dakal lang Pilipinu reng disan na keng obra. Karpinteru, elektrisyan, tuberu, warehouse man. pati keng malating upisina atin munaman accounting clerk magpasuweldu kareng Pilipinu. Agad yang kinayan a lub i Tibu keng karakal na balung pakisabyan.

Posted in OFW | Leave a comment

White Christmas

Posted on October 25, 2021 by inglibrarian

Ing Paninapan Kung Pasku
(Tune:White Christmas)


Ing paninapan kung Pasku
Anti ring sadiang balu ku
Marimlang anging mabanglu
Masayang kanta king radyu
At ing imalan kung bayu.

Koro:

Ing paninapan kung Pasku
Pane paninintunan ku
Masaya la reng ‘gang tau
Makule ya iting yatu.

Ing paninapan kung Pasku
Anti iniang malati ku
Manyamang dakal a putu
Kalame, suman, bobotu
At suklating sidsad yumu.

Ulit Koro:

Ing paninapan kung Pasku
Banua-banua aiisip ku
Manyiklod keng tegawan ku
Kang ‘Ma at kang Tatang ku
At dakal a aguinaldu.

Ing paninapan kung Pasku
Pane paninintunan ku
Payapa ya iting yatu
Manalig kang Jesu Kristu (fade)…

         -- ooOoo --

© Anac Ning Arenas

Posted in Anac Ning Arenas, Kantang Pamasku | Leave a comment

“TUNE CAPAYAPAN”

Posted on October 25, 2021 by inglibrarian

-neng ORLY MANALO DIZON
Orthografiang: C-K (ca,ke,ki,co,cu); Sucad: Labingadua; Sep. 2018

1
Ing pamanenaya malambat nang tutû
Ding tau saua no king puru pangacû,
Inia dikil Ne ing gubiernu Nang sugû
Keti Pilipinas ya’ng geua nang paindû.

2
Ausan la pansin ding biasang magmasabal
Ing calusan do ding masucal a lugal,
Ampo retang batas a dapat pairal
Ban ing capayapan king bie iyang gusal.

3
Inia marapat ding sablang manungculan
Kimut no’t paliran dinat dang catauan,
Detang mangatamad pane king tambayan
A panan mung datang ing ning paugtuan.

4
Dapat at sucat mu itamung memalen
Pakisugid tamu at masusing lauen,
Nanu ing asaup antimo ing banten
Ding mal tang carinan king nanu man crimen.

5
Agiang ing gobiernu atin yang upayâ
Gauan itang dapat king ban apauagâ,
Ding mangaroc bisyung king tau sisirâ
Balen antimurin ya na ing magcusâ.

6
Cabang maliliari iting pamagbayu
Ibie ing supporta king gobiernu tamu,
Pane lang matyagan trapong puliticu
Ban e madiscaril dalan ning asensu.

7
Mayayakit ngeni nung nanung agauâ
Na ning mamuntucan a tune maminguâ,
Caretang memalen maluat nang magnasâ
Mangatsurang bisyu lubus nang maualâ.

8.
Payapang acakit caring panimanman
Ding mayap a bunga ning pamanungculan,
A masalang lalto king banda aslagan
Itang aduan tamung TUNE CAPAYAPAN..

Posted in PL Orly M Dizon, Poeta Laureado | Leave a comment

Apolinario Mabini

Posted on October 25, 2021 by inglibrarian

Metung ya karing bayani, king kasalesayan ning bansâ
Mekilala’t, mitaguriang, paralitikung dakilâ
itang kayang kapansanan, e sumbagal ban masagkâ
ing nasa nang katimawan, karing gamat ding kastilâ

Ing La Liga Filipinang, belangkas nang Jose Rizal
iniang mesukul ya iti, ri Mabini ring tinalan
kambe na ning bayani pang, i Marcelo H. del Pilar
at Domingo Franco bilang, pamuntuk na ning aguman

Kanitang i Aguinaldu’ing, kekatamung presidenti
gewa neng pun ministru i, Apolinario Mabini
pasari ning kabiasnan na, at masampat a diskarti
megi ne pang talapayul, king nasa nang gawan niti

Matni ya buntuk nung inia, utak ne ning rebolusyun
a misulat batas para, king minunang konstitusyun
sana ing meging ambag na, gawan tamung inspirasyun
lakwas na ring manungkulan, king salukuyang panaun

Mas buri ku ne ing taung, miki- kapansanang ditak
a mesakit, uling atin, yang pag-asa pang kumayap
kesa karing manungkulan, a sasabian dang mabulas
a matuling naman pusu, mapanako’t alang utak

Pilinan kong manungkulan, ding kalupa nang Mabini
agiang makalukluk la mu, king karelang tabureti
atin la sanang prinsipyu, ampon matni buntuk deti
e kalupa karing tau, a kautak lango berdi

Pablasang ding pulitiku, a kautak berding lango
nung nukarin ing basura, karin la mamanyulapo
sasangutan da ing buluk, nitang dinat a sisingo
inia ring kaisipan da, magadtu at mebantilo

Pepatutuan nang Mabini, e sumbagal kapilan man
ing pisikal a aspetu, na ning metung a katawan
pekamaulagang dili, malino ta kaisipan
King ban tamung managumpe, king mayap a kapakayan…

Vhelle V. Garcia
October 24, 2021
Abu Dhabi

Posted in PL Vhelle Garcia, Poeta Laureado | Leave a comment

Casuyuang Pacayap

Posted on October 24, 2021 by inglibrarian



Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureado | Leave a comment

Kakaluluan mu Indu ku

Posted on October 24, 2021 by inglibrarian

Kakaluluan mu Indu ku, O Balen kung Pilipinas
A ketang makadua napun, keting Aslagan ikang Iyas
Ketang napung ding anak mu, ika mu ing pakipalkas
E na bala ing mate la nung yaslag ning kekang bukas

Pilan la ding probinsiya mung manungkulan Gobernador
Dapot pilan ? adua, atlu yang e sarili papabor ?
Pilan lang munisipyu mung panungkulan da ding Mayor
Adua la mu atang lagyung daramdaman kung mabalor

Kasakit nang pakintindiyan ing kalulu mung kabilian
Nanung klasing sumpa kaya migmula iting kaparusan
Uli kaya ning leguan mu’t mabandi mung kalikasan
Migselus la detang pati karin biga manuknangan ?

Aintindiyan ku nung ing metung o adua meging taksil la
O detang dosena kaya, aduampulu, aintindian pa
Dapot walumpulung Gobernador ding kekang probinsyia
Libu’t limang dalang Mayor, antalu ding konsiyensyia da ?

Beinti-kuatru mung senador, bakit e ku daramdaman
Mamingua queng saingsing ning daralan mung kasakitan ?
Aduan-dalan anampulu’t-walung mayap mung Congressman
Pilan la ding tapat keka, paglualu ing kekang dangalan ?

At detang kekang usgadung keng ustisiya mu maningat
A nung ninu king huwisyo da uwaran sa king katapat
Bakit keng daramdaman ku penganyaya da neng sukat
Ing timbangang piring-mata, kenuman sa e sapakat

Maging yan mang Comelec mung talatanud mung alalan
A nung kenu me penuala ing sagradu mung pagbotuan
A nung ninu kaninuman e la dapat mangabiran
Obat keng kakung balita, mepisali n’ya mu naman

Dapot lubus kung lulungkut, sepu na ning pagsalbat ku
Yang magiwan mung pamuntuk, anak ning Indung Tibuan ku
Yang nung ninung karing sabla, aintindiyan neng kabilian mu
Nanung katimbang dang bandi, ding kabalen at Balen ku ?

Posted in Poetisa Maria Sinucuan | Leave a comment

GAMAT

Posted on October 24, 2021 by inglibrarian

Sinulat neng Babaing Matun 5/26/2014

Dening kakung gamat nung kumpara ku la
Mengari lang basan kuskus keni’t keta
Nasa nang kumintab ding malda’ing dalan da
E na paalata… ‘gyang misakitan pa

Ding gamat a reni mengapal menabtak
King kakagambul da king gabung mengasias
E da man sikasu ing sakit at kaplas
Agyang dadaya la king suksuk metarak

Palad a magaspang kaku lang lalawen
Karing tanam dayat bata dang babanten
Bagutan ing dikut, king danum sesesen
Ban ating pupulan ding kayang memalen

Ngeni ko pagmasdan dening kakung palad
Ala nalang lambut ume nang kinupas
Deni mang gulis da e no ayaninag
Ing malino namu ding kalyu at sugat

Agyang nanung obra e ku’iti atrasan
Ma’pa-opisina agyang king dayatan
Lapis ya ma’t papil, ‘gyang sarul ing talnan
Gawan ku’ing agyu ku ban akwa’ing parasan

Agyang makanyan man pagmaragul ku la
E la man malambut, kutis porselana
Agyang magaspang la antimo ing liha
Dening kakung sapni apakabsyan kula

Deng lalaki ngeni malagu’ing pantunan
Gamat a malambut, manyaman aplusan
Labanus a balat, makorting katawan
Bahala nako sa ala kung pakyalam

Babie ku ing atul kekayung babasa
nung na’ng asabi yu kening kakung paksa
nung sabyan yu kaku e tutu’ing simbitla
meko keni ngeni mata’ing magsalita

Posted in PL Kate Lapuz, Poeta Laureado | Leave a comment

E MATATDANG SALA

Posted on October 24, 2021 by inglibrarian

Kabang tatais ke ing kakung panabud
Ikwa kung mesugat king gamat megayud
King pamamalagwa mepukpuk ku king tud
Asna king kasakit maybug kung gumuyud

Kilub ning aldoldo kakung pamagsane
Ikwa keng agamat mebyasang malale
Matabas na’ing dikut keta king marangle
Ding traydor a bingan lisya na’t maglele

Peynawa’ing katawan kaybat kung mindaras
Uling ketang pagal digsu ku mibatbat
King metung libluban mitakid, mitalpak
E pepaynan ing lub ‘gad kung tinalakad.

Ing aslag ning aldo king dayat manduluk
Dakal e misadsad karetang mayna lub
Myaliwa lang lasip ding karin dudurut
Manyabat keng dalan keka mamatakut

‘Yan alang keliwan king babaslen tang bie
Ding malutu pusad at byasang makyabe
Ilang sunlag kinang dyamante mong tune
A ngeni apusan gewa rang talete.

Uling nung bisa kang miras king parasan
Saganan mu’ing angin king mitmung tetagan
Nung e ka matatag pilmi nakang dalan
Busal ning pagmalun king karalumduman.

Ing karalumduman nung makapadurut
Aslag na ning bulan panayan mung lunsut
At sala ding batwin yang keka lumukub
Kanita mantabe king kekang panudtud.

Kekatang daralan nanu man kabayat
Maging mayan iti nung malda lang bubuat
kalugdang pamilyang kayaduangan gamat
E matatdang sala, babie rang malablab

BABAING MATUN 10/3/15

Posted in PL Kate Lapuz, Poeta Laureado | Leave a comment

“ING SISTEMA NING PULITICA KING BANSA”

Posted on October 24, 2021 by inglibrarian

Kening bansa tamu, nung kecatang surian
ding botantis caras, na nitang alalan
king pamagbotu ra, atin lang batayan
nung ninu ring taung, carelang pilinan
lacuas king pusisyung, matas a tungculan
manibat canita’t, ngening salucuyan

Atin man caretang, mesilo king pera’
darala na misan, ning cacaluluan da
ding aliwa wa man, deti tatanggap la’
mangibabo ya rin, carelang cunsensiya
dapot ing catutuan, mas macalamang ya’
ing cacandidatung, catambac a cualta’

King nasyunal naman, menasa ring tau
magbasi la mu rin, caretang pilidu
ustung ing darala, ning cacandidatu
sicat yang lagyu ring, matwang puliticu
ila ring menasang, buri rang bubotu
a pagtiwalan da, king ban mangubyernu

Antimo ring Marcos, Romualdez, Aquino
Roxas, Macapagal, Magsaysay, Quirino
Natividad, Quezon, Bagatsing at Recto
Tatad, , de Venecia, Legarda, Cojuangco
Osmeña, Pimentel, Lopez, Tolentino
Romulo, Concepcion, at Nepomuceno

Ople, Mangiliman, Santiago, Virata
Abad Santos, Singson, Rocco, Alinea
Joson, Bernardino, Rodriguez, Angara
Arroyo, Ocampo, Saguisag, Remulla
Cayetano, Binay, Belmonte, Atienza
Diokno, Pangilinan, Leviste, Padilla

Mapilan la mu ren, caring alimbawâ
apilidung bantug, king kecatang bansâ
king casalesayan, ning pamanibalâ
canita at ngeni e la mawawalâ
micasalat la man, e no man aliwâ
calipi da la rin, at metung mu dayâ

Inia ring artista, gulpi lang mengangas
a kinandidatu, lalu na ring sicat
uling isipan da, e ra la ibalag
ding talatuki rang, carelang abulag
agyang mulala la, pangaras king batas
pagtiwalan da la, ampon pakipalcas

Pelalung ding tau, a sadiang militar
mekisoso na rin, mekisamal-samal
pati buksingerung, lingo kaisipan
maninasa na king, matas a tungculan
sicat ca mu sa at, atin cang gastusan
e ca micacunu, nung bisa cang tagal

At keraclan caring, manungculan ngeni’
e no menaliwa, ila na parati’
mengari king ari, mate la man deti’
anac do o apu, retang manalili’
e ra ne ibili, gawan deng “dynasty”
ing sistema na ning pulitica keti……

Vhelle V. Garcia
October 6, 2014
United Arab Emirates

Posted in PL Vhelle Garcia, Poeta Laureado | Leave a comment

Makananu Kung Ipagtapat

Posted on October 24, 2021 by inglibrarian

Lorung Malabit
Silaba 12 Sesura 6/6
Taladtad 4 Estropa 12
Poema Naratiba

*
Anak, nung abalu, muna ing katutuan,
e mu ku isumpa, ampong pikasaman?
Uling ing liim a, selikut kung miuman,
ing imbut ku sana, keka ku na sabian.
**
Bingut ka kanitang, kaku pa sususu,
anyang inapa na, kata ning dara mu.
Kabud ikit ne ing, lupa mu a mamu,
menigapu na yang, aduan na ka kaku.
***
Ngana, atlu kayung, pigkalub ning banua,
kabang iya anggiang, metung man ala pa.
Migmakalunus yang, ibie ra ka kaya,
ban ing maging indu, adalanan na na.
****
Pauli ning lunus, metagkil ku pusû,
ala king sarili, kabud ku tinangû.
Ing maling desisyun, apigunam kumû,
aniang king siping ku, ala naka bunsû.
*****
King kapagnasan kung, mangidake tulậ,
yakung kinaul king, malabis a lugmậ.
Manibat kanitang, kaku naka kinuậ,
e na la melangi, ring mata ku king luậ..
******
Maralas neng bengi, e ku mipatudtud,
ing laman ning diwậ, ku ikamu kabud.
Ing kanuan mu at buak, buri kung ayagud
ban aparamdam ku, ing mapaling lugud,
*******
Dapot makananu, ku iting arapat,
menuknangan kayu, sumangid ning dagat.
Anggiang aldo’t bengi, kung magsalibatbat
tawli na at ala, nakung akarapat.

********
Kilub ning panaung, memun masalusû,
piglingad da keka, nung nanu ing tutû
Ing pepa-isip da, kamaganak ku mû,
ania e mu balung, yaku’ng kekang indû.

*********
Ustung apa yuku, neng asul ya’ing bulan,
at kakaulan da ka’t, matimid panuman,
buri kung gulisak, bamu sang damdaman,
linual kang menibat, king kanakung atian.

**********
Potang i dara mu, awsan mu neng indû,
Maybug yang malasak, ing kanakung salû.
Buri ku nang buring, keka ipabalû,
ing yaku’ng indu mung, keka miparayû.
***********
Dapot makananu, ku pang ipagtapat,
ing tutu a keka, selikut kung maluat.
E ka kaya mimua, at kaku mu isuat,
pemie ra kang anting, malan a marinat.

************
Ngeni e ku balu, ing sukat kung daptan
kakarug ku salu, at mitatakutan.
Pota nung abalu, mu na ing katutuan,
Isumpa mu ku at, lakuas pikasaman.

Rodel E. Gozum
12 Agosto 2015
Munoz, Quezon City

Posted in PL Rodel E. Gozum, Poeta Laureado | Leave a comment