Makananu Kung Ipagtapat

Lorung Malabit
Silaba 12 Sesura 6/6
Taladtad 4 Estropa 12
Poema Naratiba

*
Anak, nung abalu, muna ing katutuan,
e mu ku isumpa, ampong pikasaman?
Uling ing liim a, selikut kung miuman,
ing imbut ku sana, keka ku na sabian.
**
Bingut ka kanitang, kaku pa sususu,
anyang inapa na, kata ning dara mu.
Kabud ikit ne ing, lupa mu a mamu,
menigapu na yang, aduan na ka kaku.
***
Ngana, atlu kayung, pigkalub ning banua,
kabang iya anggiang, metung man ala pa.
Migmakalunus yang, ibie ra ka kaya,
ban ing maging indu, adalanan na na.
****
Pauli ning lunus, metagkil ku pusû,
ala king sarili, kabud ku tinangû.
Ing maling desisyun, apigunam kumû,
aniang king siping ku, ala naka bunsû.
*****
King kapagnasan kung, mangidake tulậ,
yakung kinaul king, malabis a lugmậ.
Manibat kanitang, kaku naka kinuậ,
e na la melangi, ring mata ku king luậ..
******
Maralas neng bengi, e ku mipatudtud,
ing laman ning diwậ, ku ikamu kabud.
Ing kanuan mu at buak, buri kung ayagud
ban aparamdam ku, ing mapaling lugud,
*******
Dapot makananu, ku iting arapat,
menuknangan kayu, sumangid ning dagat.
Anggiang aldo’t bengi, kung magsalibatbat
tawli na at ala, nakung akarapat.

********
Kilub ning panaung, memun masalusû,
piglingad da keka, nung nanu ing tutû
Ing pepa-isip da, kamaganak ku mû,
ania e mu balung, yaku’ng kekang indû.

*********
Ustung apa yuku, neng asul ya’ing bulan,
at kakaulan da ka’t, matimid panuman,
buri kung gulisak, bamu sang damdaman,
linual kang menibat, king kanakung atian.

**********
Potang i dara mu, awsan mu neng indû,
Maybug yang malasak, ing kanakung salû.
Buri ku nang buring, keka ipabalû,
ing yaku’ng indu mung, keka miparayû.
***********
Dapot makananu, ku pang ipagtapat,
ing tutu a keka, selikut kung maluat.
E ka kaya mimua, at kaku mu isuat,
pemie ra kang anting, malan a marinat.

************
Ngeni e ku balu, ing sukat kung daptan
kakarug ku salu, at mitatakutan.
Pota nung abalu, mu na ing katutuan,
Isumpa mu ku at, lakuas pikasaman.

Rodel E. Gozum
12 Agosto 2015
Munoz, Quezon City