ING PAMAKYASAWA

Posted on May 8, 2023 by inglibrarian

Irvin Harvey Rivera
Siuala Ning Maliwalu/Anac Ning Baculud
October 15, 2017

Ing pamakyasawa e ya kabud biru
E ya anting nasing kinalpa’t ginadtu
Kailangan magaral, kailangan maturu
Bang e mu dasan ing magparugu-rugu.

Namnaman mung binit ing tula ning aldo
Diwang kayanakang pigkalub ning babo
Pakaukulan mu ing aldong miyayo
Uling atyu keka ing mal mung talindo.

Dapat mu pang gawan ing lungub iskwela
Karin magaral ka pa’ t magpakabyasa
Buklat mo ring libru, mamintu keng mestra,
Mangayap dang usuk, pakamalan mu la.

Ding sablang amanung guingkas ning Indu mu
Ilang maulagang dake a amanu
Pakisabi ku sa karing kalupa ku
Sopan tala pa sa’ ring pengari tamu.

Nung ayari mu ing kekang pamagaral
Alang impusibli, ala nang sumbagal
Ala nang migit pa king belwan at dangal
Ning metung a tau king akwa nang galal.

Ing pamakyasawa dapat yang piyadyan
King ustung panaun nung marapat luban
Misip kang mayagap bang e mu pagsisyan
Mesayang a oras at mal a taguimpan.

SiualaNingMaliwalu #AnakNingBaculud

Posted in Bie, Poesia, Poeta Irvin Harvey Rivera | Leave a comment

Yng bie

Posted on May 8, 2023 by inglibrarian

Neng Al Pedroche
Alas tres medya ning abac

Yng bie na ning tau
E mu atatasa,
Masican ca ngeni
Pota maina na ka.

Ngeni macualta ka
Bucas calulu ca,
Sinulapo no ngan
Reng atipung pera.

Pati caluguran,
Mengabating la ngan
Aniang maguisan yng
Quecang cayamanan.

Atin metung tau
a pacacalulu,
Ala yang cabiaian,
Canan mang asubu

Nune mu yng tagan
Quilcal qng basura,
Mate ya qng danup,
O macalunus ya!

Niang metung a’yaldo
Atin yang atupan
Queta qng basurang
Queyang cacalcalan.

Bag yang alang laman
Nune ticket Lotto,
Agad na neng quinua
“Baca maniambut cu”.

O yng Dios, o yng Dios
Tutu yang malugud,
Yng ticket nang Lotto
Cabud niya mu tinud!

Dinalan a milyun
Yng mibulus queya,
Yng sadyang pulubi
Migbayu yng bie na!

Posted in Bie, Poesia, Poeta Alfonso Gomez Pedroche | Leave a comment

Metula

Posted on May 8, 2023 by inglibrarian

Metula ya ing pusu ku,
Mekabasa karing atba mu,
Akabyusan ing pag subuk mu,
Sakit a binata mu,
Ngeni kinayap at menumbalik
na Ing sikan mu,
Dakal salamat queca O Guinu
🙏🙏🙏

Simpleng Kapampangan

Posted in Poesia | Leave a comment

Liling ayup

Posted on May 8, 2023 by inglibrarian

Atin Kung liling ayup,
Menibat ya king sinta,
King tulid mung awang,
Dadalit magkanta,
Emula sana pagkait
ding mapundat mung Mata,
ay Kasakit na
Ning tutung Malsinta,

Simpleng kapampangan

Posted in Poesia | Leave a comment

Masakit ing Pogi

Posted on May 7, 2023 by inglibrarian

Part 3

At inyang miras ing takfdang bengi na ning koronasyun
keting mesaglawe Balen mirarapal na kung sinun,
uling ngaku… keng pyestahan, masanting na ing maranun
ba’kung makapag-paynawa at mitagal pang makyapun,
pablasang kanyang pamangan… lalu na nung e ku gugul
balaus kung tutu gamat at paglipat bale-metung.

…

Posted in Ari Ning Crissotan, Ari Ning Parnasu, Dolores Lopez, Komidya, PL Jose M. Gallardo, Poesia | Leave a comment

Masakit ing Pogi

Posted on May 6, 2023 by inglibrarian

Part 2

Karing makirandam a ren… Ing marahil ati’nang mwa,
malyarng atin mu namang pupuri o matutula
Dapot, matula’t mwa la man.. daka’la retang magnasa
a ing Jose Gallardung yan, king personal akit de sa,
uling agyang balu ra na ing timbri ning kayang swala
dapot ing kayang itsura e ra balung pamalita.

…

Posted in Ari Ning Crissotan, Ari Ning Parnasu, Dolores Lopez, Komidya, PL Jose M. Gallardo, Poesia | Leave a comment

Masakit ing Pogi

Posted on May 6, 2023 by inglibrarian

Part 1

Kening kanakung kabilyan, uli na ning matwa na ku
inya e na ku sa bisang tatalakad keng publiku,
lalu king pamangorona karing Reyna babo Tronu
bala’ku wari tutu nang alangan ing kabilyan ku,
kadwa keta ding manalbe e ko buring madisgustu
ayantimo king milyaring isalita ku kekayu.
…

Posted in Ari Ning Crissotan, Ari Ning Parnasu, Dolores Lopez, Komidya, PL Jose M. Gallardo, Poesia | Leave a comment

KAPAMPANGAN

Posted on May 6, 2023 by inglibrarian

Irvin Harvey Rivera
Siuala Ning Maliwalu/Anac Ning Baculud
July 28, 2017

Kapampangan kung misapwak,
Kapampangan ku ring mate;
Ing sablang bage marawak,
nung makananu rang bikle;
Amanu ta’ng medamusak,
Akakit meng mamamate;
Nung makananu reng dilpak,
makanyan deng pekilibe.

Amanu ku ka’kung siswan,
e ku bustan dang ikutkut;
Pamakle re man mulangan,
Iti yang e ku paintulut;
Nung nukarin man ing dasan,
e naku bisang painggulut;
Nung mate ne ing kabyasnan,
malaus da neng ikutkut.

Kapampangan ku king daya,
king isip, pusu at gawa;
Kapampangan– ya ing mutya,
ing musa ku at kaladwa;
Kapampangan– ia’ing inawa;
a pepamana nang Ima;
Kapampangan– ia’ing tumaila,
Karing dalit ning makudta.

Kapampangan e ia kabud,
Amanung gingkas ta’ asbuk;
Nune metung yang Amanu,
tubu king alayang bunduk.

SiualaNingMaliwalu #AnacNingBaculud

Posted in Amanung Sisuan, Poesia, Poeta Irvin Harvey Rivera | Leave a comment

TALIKALA

Posted on May 6, 2023 by inglibrarian

Makuyad A Poesya
Irvin Harvey E. Rivera
Siuala Ning Maliwalu/Anac Ning Baculud
August 15, 2019

Kapayit na irug yang bungang Apalya
A kanakung pipul—lugud yang piraya
Yang mamu kung pusung yayampang kung sarya,
O’bat tikusan mu–likwan mung daraya?

Nanan ku pang dalit nung kelingwan mu ne
Malagung musikang agnan ta’ng gagale,
Na’n ku pang sumulat kawatasang babye—
Mayumung panirug king sisintang tune?

Neng managulele at manigapu ku
Ala kung agingkas nanu mang Amanu
Magparalumpu kung mamawus king Guinu,
O’bat makanyan pa ing meguing ablas mu?

Na’n ku pang gulisak king tula paylumud
Nung pisumpanan ta’ kayagnan nang menyud?
Nanan ku pang kawe king dayat ning lugud,
Nung king bandang sepu aku mung malumud.

Inya ngeni, aku pabustan da na ka
Kalingwan ku na ing megui mung ulaga
Ding sablang milabas a aldong palyasa
Kayagnan kung ‘kutkut, kayabe ning dusa.

At bayu ku mamun ikutkut ku na ngan
King baul ning isip at pamangalingwan
Pututan ku na yang kapasimbalangan—-
Talikalang lilu na ning kapalsintan.

SiualaNingMaliwalu #AnacNingBaculud

Posted in Palsinta, Poesia, Poeta Irvin Harvey Rivera | Leave a comment

“tumpiak”

Posted on May 6, 2023 by inglibrarian

sibuknan ko pu reng amanung buldit o sepung “ak” kening poesia para ketang paskil nang koyang Herman bilang pamagaral keng amanu. egangana pung linia niting poesia atin amanung buldit o sepung “ak”. aini pu ing poesiang

“tumpiak“:

anti ka mo waring menakit burirak
pero makanian ya’ taganang gagayak,
ing tilas na palda anti yang linapak
mula king babo tud angga lalam tumpiak.
e no naman wari ayayalak galo
deta nang lalaking magbasak aldo’ldo,
neng sake ne keng dyip, saksak lang maniglo
uling magpiak la man akit de ing lulto.
pota naman galang sanak na no kimot,
balu na lang misip kareng ditak balot,
aggiang deng dugang trak a tiktak man lambot,
apasias no reti keng dawak da imbot?
pero keng lalon da, malak la man mata,
manuk ya’t e tugak ing paninasan da.

10/29/21 /06:05
kabang miminum kape
(meulip)

Posted in Crusada: Mangapampangan Tamu, PL Tuazon Sabandal, Poesia, Sonetu | Leave a comment