“e mimin, mimin man”

Posted on April 22, 2023 by inglibrarian

nan ko ta balugbug mibalabalugbug
kareng poesia na ning amanung irug?
e la sangkan deta ban mimin ku ibug,
at king pamilalang rima e na talbug.
sakaling reng batuin e no bisang sunlag?
o kaya ing aldo tamad nia rin saslag?
ing kakung amanu e ya mimin tindag
aggiang kandila mu e ku tuknang paslag.
nung keng marangle na ning kakung amanu
e na murin matak ing uran mang nanu,
e murin sangkan ‘ta ban langi yang ustu
uling tugtugan keng sariling pawas ku.
inia nanu pa ta, ing sabla mimin man,
e ku mimin lingap keng amanung sisuan.

07/01/20 /13:43 (gcq)
bayu manalung samentu

Posted in Uncategorized | Leave a comment

“king mabilug a lugud”

Posted on April 22, 2023 by inglibrarian

adduang ukdu rakang ‘nurungan keng adduan
-keng adduan ku kekang ing lugud pisuluan,
pisuluan ing lugud a alang pilatan
king pamilapat ta babayang katawan.
kareng adduang ukdu a inurungan ku,
panakit ku kasi e buu ing lub mu,
wa man, at buri mung musig ka kanaku,
pero ing kekang lub e pa buung kaku.
pero misan aldo ning pamitupa ta
masala kung ikit kareng kekang mata
ing kaku kang buu at buung kaku ka,
at ipus tang lugud, alipan tang sinta.
kanita ku tikman ing sintang dalise
a kareng uyat ta malayang kinawe.

07/15/20 /17:12
kaibat mengan pasta

Posted in Capampangan Shakespeare, Lugud, Palsinta, PL Tuazon Sabandal, Poesia, Sonetu | Leave a comment

SAMPAGANG MELANAT

Posted on April 22, 2023 by inglibrarian

Neng: John Bendido

Ikit dakang mamayagpag, ketang patak na ning uran,
Kindat kindat kupa keka, ketang makule mung leguan,
Ing banglu mu sisingalngal, mikakalat ketang dalan,
Sasagana keng lupa ku, penyingut ku mitmung timan.

Malamyus ing kekang kimut, ketang angin ka kekenbut,
Uling itang kekang tangke, katamtaman ya keng lambut,
Itang dikut kukulate, keng lele mu pakadurut,
Memaluput ketang sanga, maninasa keka mabut.

Dapot ining kakung pusu, kabud yamu memaglumbe,
Anyang memagbayuk nala, detang bulung ampong tangke,
Ikit kupang patak patak, ing agta mung sasagese,
Anya lalu kang mibusal, keng dikut ning tagulele.

Sampaga ka keng pusu ku, dapot kabud ka melanat,
Migtikum kang alang patna, mengalaput kekang wakat,
Mengari mo keng amanu, liguran meng malinatnat,
Dapot bigla meng kelingwan, ‘yang minta ka lipat dagat.

Anya’y sampagang melanat, amanu yang mengadaldal,
Kareng daiwan memanyatang, lalu yang mengabalbal,
Nung wari mo keng melumud, nung nokarin mengapalpal,
Segipan de reng poyeta, atin lugud at masabal.

Mibalangkas ya ing poesia
April 21, 2023 – Biyernis
Oras: 6:45 PM

Posted in Amanung Sisuan, Poesia, Poeta John Bendido | Leave a comment

Y Apu Cu

Posted on April 22, 2023 by inglibrarian

Maluat neng ala yatu y apu cung Anggi. Anac cu pa mu aniang memun ya queti labuad. Pero agaganaka ko pa reng culubut nang balat at yng queyang panga bungal. Atin cung sinulat a poesia para queya.

Y Apu cung Anggi anggia man bungal na,
Yng luyus at samat atiu queyang lele.

Asung, calacati, pane nong carungut,
Pandunut qng luyus a ena alangut.

Pulisan neng api itang bulung samat,
Ticlup bang malati saca na balibad

Quetang capirasung
Luyus asna casias,
Caibat dunutan ne qng asung, masamas.

Yan mu yng ligaya ning Canacung apu,
Nung turing yung bisyu, pascencia na co pu.

Posted in Poesia, Poeta Alfonso Gomez Pedroche | Leave a comment

Yng Gamat

Posted on April 22, 2023 by inglibrarian

Al Pedroche

Telan que’yng buntuc cu,
Quirut, penamdaman!
Tigquil que’yng atian cu,
Sasaquit ya naman.
Pati reng bitis cu
Masaquit lang talnan.
Reng sablang parti ning
Canacung catauan,
Istung tigquil cu la,
‘Ba’t quiquirut la ngan?
Pintan que yng doctor,
Seria cung mengutang,
O, bakit pu caya
Yni’yng panamdaman?

Doctor:
”Ala la ngang saquit,
Buntuc, bitis atian,
Nune mu yng gamat
A quecang panalan.”

Posted in Poesia, Poeta Alfonso Gomez Pedroche | Leave a comment

“e mangandiria”

Posted on April 21, 2023 by inglibrarian

dimdam keng persunal keng pangatau ku
itang sinabi na metung a tau,
metung matenakan karas kareng bersu,
uling ing pusu na dunut yaring ustu:
“e ko pangandirian deng lasip,” ‘yang gingkas,
“a maniamantalang marangle ning oras,
king pamikasala e malilingasngas,
at kenung konsensya ing e mimamasmas.
at ing metung ayup e ke pangandiran
nung mibait neman king metung kulungan,
at mibait ya mung ala man kabaluan
kaniang kaneldo nang timpla ning kakewan.
…mayap ing linugud kayi mebating mu
kesa keng bitasang e linugud tutu.”

11/10/20 /12:08
kabang makasake dyip pagmanibaug

Posted in Capampangan Shakespeare, PL Tuazon Sabandal, Poesia, Sonetu | Leave a comment

“e king nanu man sangkan”

Posted on April 21, 2023 by inglibrarian

ing lub, alang aldo a e me delawan
ban ing kakung lupa arinan meng timan,
uling suala mu pa’ ana ne kaniaman,
anti yang musikang pakapiramdaman.
bala ku pin dati, bilib ku mu keka
uli ning ganaka’t ning aslag mu lupa,
o ning talik kaul, o labing gayuma,
o ning kekang lugud binie sobra-sobra…
-ngana ning pusu ku, tutung mal kang bina,
na’ ka man ugali, atiu ka ma’t ala;
kumupas man leguan, o mimin ganaka,
ing tibuk ning pusu e matnang bitasa.
mal ka e king uli ning nanu mang layun,
nune kabud lugud a mangga king pantiun.

01/11/21 /12:28
kabang panayang makibat ing kasabi keng telepanu

Posted in Capampangan Shakespeare, Palsinta, PL Tuazon Sabandal, Poesia, Sonetu | Leave a comment

“ot e mibalek?”

Posted on April 21, 2023 by inglibrarian

neng dagpa ing uran anti yang maniora,
anti nang sasabian, “komusta mulala?
atiu ne gamat mu, nanu ka pa gewa?
ot pebusten me pang misan mu meyala?
ot matinatinang tutu naka timan,
tutu naka aili’t sagakgak masikan;
ing kulang keng bie mu kaibat meng atupan,
ot pepaburen meng mebating mung misan?
obat penualan mu itang sasabian da
a nung tagana ping keka ya ing sinta
istung binulus me, mibalik ya keka…?
-ngeni sisisi ka keng apasari ra.
…isipan na mekad, inia binulus me,
ala yang ulaga’t timbang keng kekang bie.”

01/21/21 //17:49
kabang makasake shuttle

Posted in Capampangan Shakespeare, Palsinta, PL Tuazon Sabandal, Poesia, Sonetu | Leave a comment

E YA MABAWAS KENG ORAS A MILALABAS

Posted on April 21, 2023 by inglibrarian

Ining lugud ku keng oras milalabas
Kapilan man e ya bitasang mabawas
King kanakung pusu karin ya miyaptas
Uling para keka iti e ya matras.
Ining kakung pusu keka ke mu ibie
Kakung pakisabi, pakaingatan me
Nung mikalamat ya pota iya’yng mate
Ing dating saya na, mawala’t tumamle.
Ing kanakung lugud keka ke panwala
Uling ing balu ku lingapan meng kusa
Paingat ke keka e ka magpabaya
Kening kekang siping ban e ya mawala.
Uling ining lugud alang pamagbayu
Angga na king wakas ning bie ingatan ku.

🍃 ningning ning magalang 🍃
(melanie24feb2019)

Posted in Lugud, Palsinta, Poesia, Poetisa Melanie Cunanan Naguit, Sonetu | Leave a comment

“king alaala ning napun”

Posted on April 20, 2023 by inglibrarian

deng kanakung bitis mabayat la takbang
pero susulung la, e la bisang tuknang,
masukal ining lub pero e tatabang
tumalas king napun a kaplas inampang,
pablasang king napun karin ya megabak
ing salu kung keka megunang mataktak
a megin sangkan na ning bagyu babatak
a pepalbug kaku karing luang minatak.
dapot ining lub ku tutung katulan na
ing balik-balikan ing salpak at dusa
uling angga ngeni e ya mabubura
ing laggiu mung king lub a makintal letra,
pablasang king busal ding napung maplas pin
dakal sari yumung alaala murin.

05/02/20 /08:03
bayu manos pinggan

Posted in Capampangan Shakespeare, PL Tuazon Sabandal, Poesia, saddia3x, Sonetu | Leave a comment