“salamat”

Posted on April 20, 2023 by inglibrarian

kening kakung salu ampo kening ukul,
ing metung a bage a pane durukul
iya ing “salamat” -salamat maragul
uling ing kakung bie gewa meng makulul.
dati pane ka man maratun kening bie
mamagdatun ka mu keng paninap pane;
ing pusung mamitang kekang akayabe
ikang pamanda nang panamdamang lumbe.
inia pin salamat, dakal a salamat
king lugud mu kakung binie adduang gamat,
kareng kekang kaul binie alang awat,
ampo kareng umang binie mung pakibat.
salamat keng kekang masampat a sinta
a sana mananggang anggang alan’angga.

06/20/22 /08:31
kaibat mendilu

Posted in Capampangan Shakespeare, Palsinta, PL Tuazon Sabandal, Poesia, Sonetu | Leave a comment

“eks”

Posted on April 20, 2023 by inglibrarian

ngara ing kanung “eks” e me babalikan
-“e ne map babalikan” ing mas mayap sabian,
pablasang eks ne pin a ing kabaldugan,
iti e ya ustu, mali yang amanuan.
mengari mu keng test, ing eks kanung marka
mangabaldugan mu a iti mali ya
inia pin kaniti dapat kang mabiasa;
tandanan me iti, at e ulitan pa.
mekad pin ustu la nung ita ing kustiun,
mu pin, e ya ustu keng balang situasiun
pablasang iyang eks marka re reng mantun
importanting bage pagserian apantun.
pablasang keng mapang kayamanan, iti
ing tanda nung nu ya’yng tulang alan’anti.

04/16/23 //08:58
kaibat mengan “snacku”

Posted in Capampangan Shakespeare, Mala-Sonetu, PL Tuazon Sabandal, Poesia, saddia3x | Leave a comment

“bayu ka sugal”

Posted on April 20, 2023 by inglibrarian

obat mo pin kaya manyiguradu ka
kareng bage bage maulaga keka?
obat e na ka mu kabud barabara
kesa keng ing ukul din me pang prublema?
ngara magduda ka bayu magtiwala
keng nan’ mang ‘subu mu ban e mu iyapsa,
aggiang pang lupa yang makakayat wawa,
pota lasun neman a teraying guna.
anti mu keng gintu dapat kilatisan,
pota tansu yamu iting kelupkupan,
o buldit yang basung pekapakinangan
ban maglupang batu a makikatasan.
lakuas nung ing kekang tataya ing pusu,
manyiguradu ka bayu ka mángáku.

04/19/23 //17:48
bayu maglutung brocolli

Posted in Capampangan Shakespeare, PL Tuazon Sabandal, Poesia, Sonetu | Leave a comment

Ing Malagung Dalaga

Posted on April 19, 2023 by inglibrarian

Neng Josephine Luz de Leon-Pineda
Ning Balen Baculud
Estropa: 10 ; Linya: 4
Sucad 14 silaba; Rima: a, e, o, u

Atin cung aquilala/ malagu yang dalaga;
malambis ya itsura/ mapundat queyang mata
queng pusu tataglus la / detang balang ayli na
deng balang amanu na/ anti la mong musica.

Potang lapitan mu ne/ anti ya mong sampaga
Sasalingalngal ya banglu/ tutung macayama
potang casabi mu ne/ ing malagung dalaga
siuala lang gagale/ queng pusu durugpa la.

Mecad dacal magdulap/ malsinta quing leguan na;
gugusal king timyas na/ lulugud at malsinta
lalapong upaya ra/ ban mung palabungan da
at apalto ing lugud/ quing malagung dalaga.

Bista man dacal susuyu/ deng mata malungcut la
Nucarin ing quislap ning sala /baquit dimut ya
bista man malagu ya/ aguia mang matimyas ya
lalacuan de’t paglibe/ ring taung asajan na.

Misan cabang pauli / acatalamitan que
mabayat ing saingsing/ sucal lub yang inapse
ing lagu nang saslag/ mitda at milaco cule
pauli da reng taung/ alang masabal quing bie!

Ing malagung dalaga/ malulam queiang asque
aquit mung mangaina ya/ uli ning piglibe de
quing aliuang dalagang/ ibat quing siping bale
bayu ya quing itsura/ bayu caring manalbe.

Antila mong meniglo/detang matang meglolo
licuan de at piglibe/ queng babaing magaslo
maculureti gayac/manayun yamong lulto
oyta’t didiquit-diquit/ cabud na maquigayo.

Dalagang piglibe ra/manangis queyang pusu
Dapot e ra iquit/miguit quing metung guintu
Alang nanumang bage/ ing carela bumuu
Nune itang dalagang/macamal at malagu.

Cacu pang aquilala/ ing malagung dalaga
Malambis ya ping tutu/emu quing itsura
Malagu ing pusu na/ bie yang alang capara
Dapot manasaquit na/pilit pibabatan pa.

Maquirandam ca abe/ queca que paquilala
Pilming quilalanan me/ mecad luguran me pa
Palabunga’t lingapan/ ing malagung dalaga
Amanung Capampangan/ ya pin ing lagyu na!

Posted in Poesia, Poetisa Josephine Pineda | Leave a comment

“pota naman galang?”

Posted on April 18, 2023 by inglibrarian

(pakibat keng “emu na kailangn sabyan pa”)

isip isipan ku ing kekang sasabian
dikil king kaku mu pamimilarawan,
mengapangamus ku, at maslam tiniman
-buri mu ku yatang sake bulung kuayan….
pablasang nung tutu ing kekang salita
a metung kung taung tutung maganaka
a ‘giang ni’ng babai mabaldug manawa,
magmap kampanti ka’t e migaganaka?
uling nung sakaling tutu ka amanu
a maki kimkim ya ing lub mu kanaku,
ot mo taimik ka’t anting alang nanu
ing mabaldug la lub deng babai kaku.
o pota ing kustion inia makanian ka,
nung wari keng saken, dugang kung reserba?

04/18/23 //16:30
kabang magkape, kaibat mengan siopao

Posted in Capampangan Shakespeare, Palsinta, PL Tuazon Sabandal, Poesia, Sonetu | Leave a comment

“E muna kailangan sabyan pa”

Posted on April 18, 2023 by inglibrarian

(pakibat keng sonetung “magpiak ka sagli”)

Ing lawe ku keka , metung kang maginu,
keng balang kimut mung dalise’t mapinu,
kambe ning yapse mung de kahun amanu,
yang magpatingkad keka’t king pangatau mu.

Maski ‘ning babayi mabaldug lub keka,
maganaka naka at masipag kapa,
ala kapang bisyu’t e pa babarkada,
inya ninu yakung e mamin lub keka.

Nung sabyan ku keka , manwala ka kayâ?
ing kikimkiman ku, ngeni ku paswala,
kaibat ning pamikit , a e ta sinarya,
iting kakung pusu , lubus yang mesaya.

Sana mikit tapa king takdang panaun,
ban ding pusu tamu , ‘me lang misanmetung .

4/17/23
10:00 PM
(Kabang magmuni muni)

Posted in Palsinta, Poesia, Poetisa Patria Bondoc David, Sonetu | Leave a comment

“magpiak ka sagli”

Posted on April 18, 2023 by inglibrarian

neng makatakad ka panimanman kaku,
o lalon diretsa deng adduang mata ku,
nanung sasabian da keka reng mata mu
a yang akakit da parikil kanaku?
akakit da waring kalupa ring al’wa
a metung ku mu ring kaladuang salaula,
at ing balu ku mu tatalbug keng sapa,
at kaibat sasaka a anti mong ala?
ala wari aggiang ditak a parunggit,
o ayayaninag aggiang mung kapurit
a ing kekang lalon -ing kekang akakit
iya’ng king pangaku keng altar magkumit?
siguru pin ala inia mangutang ka,
-timplan me ing lub mu, at al’wa reng mata.

04/16/23 //05:48
kabang magalmusal kape ampong hopia

Posted in Capampangan Shakespeare, Palsinta, PL Tuazon Sabandal, Poesia, Sonetu | Leave a comment

MAYUMUNG TIMAN KENG BALEN KUNG TIBUAN

Posted on April 18, 2023 by inglibrarian

Neng: John Bendido

Maili cung manyaman, keng balen cung tibuan,
Cabud ‘tin cung dimdam, a manga pampangan,
Ing canacung pusu, ampong panamdaman,
Lugud keng amanu, alang capupusan.

Anya nung buklat me, pasbul ning pusu ku,
Ing mal tang amanu, iyang dinukit ku,
At tataluntun ya, carening uyat ku,
King aldo at bengi, yang asasambit ku.

Nanu yaman lugal, a kacung puntalan,
Miyaliwang lahi, kacung pakyabayan,
Ining Kapampangan, lalu keng gambulan,
Uling yang gugulis kening cacung canuan.

Ining kaigewan cu, tutu yamung dimut,
Balen cung liguran, e cu pagkayimut,
Ilantang cu keka, beluan cung caramput,
Mengari cu ketang, dicut a megutgut.

Ngeni keng balen cu, labuad Kapampangan,
Kilub ning salu cu, mayumung titiman,
Ing candungan daka, ampong pacamalan,
Kambe cung magduyan, keng amanung sisuan.

Mibalangkas ya ing poesia
April 17, 2023 – Lunis
Oras: 7:40 P M

Posted in Amanung Sisuan, Poesia, Poeta John Bendido | Leave a comment

Timan

Posted on April 18, 2023 by inglibrarian

Pakibat kang Patria Bondoc David
Ketang kayang “Timan”

Timang Matindag

nang Apung Gusting
17/4/2023 Riyadh

Aggiaman akakit mukung makatiman
Makatiman ku pin dapot e lubusan
E lubusang bina, nune talipanpan
Talipanpan ne ning kakung pibabatan.

Kening babata ku, ing pusu tatangis
Tatangis ya uling magmalun yang labis
Labis pa king bayat ding luang babalisbis
Babalisbis karing pisnging mangalumpis.

Mangalumpis ku man king kakung kalbaryu
Kalbaryung bubwat ku king anggang agyu ku.
Agyu kung talakad…tikdo pasibayu
Pasibayung salbag ing timan king yatu

King yatu e mate ing timang matindag
Patindagan ke pa itang kayang aslag.

Posted in Anadiplosis, Poesia, Poeta Apung Gusting, Sonetu | Leave a comment

Kapampangan

Posted on April 18, 2023 by inglibrarian

Kapampangan…! Yan ing Dai ding pantas at mangatapang;
ing Tribu ra ding Maginu; ing lahi ra ding Mahalan;
Kapampangan…! Yan ing lagyung milalablab king dangalan
king bilunga’ ning istorya e na mapda kapilan man;
kasing timyas nign dalit da ding angheles king katasan.
…

Ambag neng Dolores Lopez

Posted in Amanung Sisuan, Ambag, Ari Ning Crissotan, Ari Ning Parnasu, Dolores Lopez, PL Jose M. Gallardo, Poesia, Poeta Laureado | Leave a comment