“aminan ku megkamali ku”

Posted on April 13, 2023 by inglibrarian

bala ku mo sana atisuran ku ne
keng pamanlakad ku ing lugud a tune
inia pin ing sabla laus lub kung binie
at king pangatau pepalausnan ke.
kaniaman lulugod, anting gagato ka
istung kasabi me o abe ing sinta;
anting susulapo karin babo banua
istung ing kaul na’t uma pagpa keka.
at uli ning sinta binie ku ing sabla
dapot bandang tauli minuli king ala,
gilutan na ku mu’t gewang alang bala
ing sabla kanaku kaibat na ngan ikua.
ngening mesintang ne’yng dapat ingatan ku,
nu’nti ku kababa keng panimanman mu?

08/22/20 /15:06
kabang mamipi

Posted in Capampangan Shakespeare, PL Tuazon Sabandal, Poesia, Sonetu | Leave a comment

“bakit?”

Posted on April 13, 2023 by inglibrarian

maibug kung mapaldak keng kanakung obra,
ing diwa ku kanu sulasulapo ya,
e ku seria dapot e ku ayaguanta
uling king isip ku, pilit pin lulub ka.
ta’balu king pusu, pilit neng agiagan
sulapo ing diwa ban nakang dalawan
karing miyaliwang lugal tang inayan
neng ing sarili ta buri tang kalinguan.
pero ing sukal lub misan na ku’ epa,
at pepatapus na’yng pisulu tang tula,
ing pilit nang tenam, kamua ampong sama
uling abalu kung tutu ing balita…
rugu juan, ot e ka mekuntentu kaku?
e mu pala akung lalaki king bie mu.

sabandal
09/04/2019 /19:43
kabang makasake dyip pag-angeles/manibaug

Posted in Capampangan Shakespeare, Palsinta, PL Tuazon Sabandal, Poesia, Sonetu, Uncategorized | Leave a comment

SANTA LUCIA ACADEMY

Posted on April 13, 2023 by inglibrarian

(Ika ing Alma Mater mi)

Anti ka ping lamu isla, libutad ning dayat-malat
Sanglaran da reng kalulu, kanlungan ding kapus palad
Ketang dekada singkuenta, kanita naka telakad
Nitang suging Jose Puno a king Leyte pa menibat.

Santa Lucia Academy sasagisag ning kabiasnan
Ikang bukud ming aligan ketang gatas a maniaman
Ing sabla mung kapagnasan neng manapag kang pamangan
Tiru mu ing makakabsi ketang mayap a paralan.

koro1
Salamat Salamat keka Santa Lucia Academy
Kambe da reng masugid mung talaturu at faculty
Tatangalan ming ken kami mebiasa at mengayari
Nung e keka SLA nu la ngeni reng kekeng kaklasi.

Anti kamo ing sampaga ding punlas mu memukadkad
Dakal la retang maniglo ketang banglu mung salsabag
Retang anggang mekasangap king kanangga mung linimpad
Pengalat de ing lagyu mu at sulu mung milalablab.

koro
Salamat Salamat keka Sta Lucia Academy
Tatak SLA ng Pag-Ibig, Ika ing Alma Mater mi
Pagmaragul dakang ken kami megaral at meyari
Nung e keka SLA, dakal E managumpe kekami.

            -  -  - o ○●○ o -  -  -

*Panagimpan at masipit a pakidwang ning Ginung Teddy Jimenez a mika-imno ya ing Alma Mater ming Santa Lucia Academy(SLA). Mupin king dimut kung beluan ining aba kung asulat, iya rugung agyu nang abutan. Matula nakuman ing mangmang a tala-Bagse ning Kailugan ing keyang lepitan. Bistat man iti E ya pa milapatan tonu o musika.

Posted in Kanta, Poesia, Poeta Bagse Ning Kailugan | Leave a comment

Ika kabud

Posted on April 13, 2023 by inglibrarian

Dapat ku pa waring , keka ku ibuklat?
ing lama’ning pusu , manibat king ibat,
king metung a lawe, é pa wari sapat?
karening mata ku, masdan mu’lang sukat.

É wari neng baláng , misuglapan katá,
kareng mata akit, ing pámi palsintá ,
é na kailangán pang , ing sablâ espliká,
uling ika mu ing kanakung ligaya.

Nung abuklat me mû , ining kakung salû,
karin muyá akit , íyang kekang lagyû,
keti ya meyukit, king umpisa pamû,
Inya ika kabud , ing tibuk ning pusû !

Sana ika murin , makanyan ka naman,
mikit tapa kayâ , king kekang panyatang?😂😂😂

(Kapakibat ketang pinaskil ng Tuazon Sabandal)
neng; Patria Bondoc David ( Tsokolating lagu lagu)

Posted in Palsinta, Poesia, Poetisa Patria Bondoc David, Sonetu | Leave a comment

“ngeni”

Posted on April 13, 2023 by inglibrarian

iniang muna rakang apansinan lagu,
kareng kakung mata asna ka kalagu;
pekalawe raka, tutu kang malagu,
kabang lalon daka lakuas kang lalagu.
linakad ing aldo, minuli king bulan,
minuli lang banua reng bulan daralan,
ngeni dekada no reng banuang dinalan,
ngeni ta pa ulit mikit panimanman.
e naka malagu a anti kanita,
asisiguru da rening kakung mata,
keng mang kakung pusu agad kinunsulta
-deng kanakung mata sinigundan nala
uling lakuas ka pang melagu keng dati
-petibukan mu ku pusung mas masiri.

09/21/20 /15:06
kabang atyu ospital

Posted in Capampangan Shakespeare, Palsinta, PL Tuazon Sabandal, Poesia, saddia3x, Sonetu | Leave a comment

“kapilan kaya?”

Posted on April 13, 2023 by inglibrarian

keng kakung sarili ing pane kutang ku,
kapilan ta’ kaya mikit pasibayu
ban pasibayu ku a maging bandi mu
-takman pasibayu ing lugud mu kaku?
ot kabilis tamung mesagsag a daklat?
ot ing lugud kaku kabilis miglamat?
keng pusu mu wari e ne maiingat
ining murit keka ibat pa keng ibat?
tutu pin mo kayang mikalugud kata?
o ketulan mu mu’t pigkamalian sinta?
dapat ku pa kayang manenaya keka?
o payalipan na’ng lumbe anggang-angga?
kapilan ta’ kaya pasibayung mikit
ban mu nang aulu ing kaplas at sakit?

09/15/22 //12:12
kaibat mengan pansit kanton

Posted in Capampangan Shakespeare, Palsinta, PL Tuazon Sabandal, Poesia, Sonetu | Leave a comment

Bougainvillea

Posted on April 13, 2023 by inglibrarian

Bakit mo pin kayâ reng kekong sampaga,
makabye lang timan kening kakung lupa,
ing panamdaman ku , e ku ayisplika ,
kabud ku masaya , asmu kaligaya.

Posted in Poesia, Poetisa Patria Bondoc David, Tanaman | Leave a comment

Siklod, Siklaud

Posted on April 13, 2023 by inglibrarian
Posted in Kataya, Poeta Bagse Ning Kailugan | Leave a comment

ubas at alak

Posted on April 13, 2023 by inglibrarian

king babo ning banua manakit kang ubas,
at king mismung banua, alak ing makapag;
at ing sarili ku lalawen kung matas
–makabage kaniang ubas ampong alak.
…ini e makapag keng babo lamesa,
at ding makatakman –lakuas daranup la;
ing lasa na niti paninintunan da
–kalupa nang Zeus, ini ing kapad na.
dakal la reng taung kaniti maburi,
pelalung e dapat, e bisang paitauli,
matua’t talasawa, talasawa’t ali,
e matua’t e ali, e kabud payali….
aku, reting ubas, bengi ko agtalan;
king alak metung ya’yng kalis pinunuman.

Posted in Capampangan Shakespeare, PL Tuazon Sabandal, Poesia, Sonetu | Leave a comment

Inuyat

Posted on April 12, 2023 by inglibrarian

Kinawu cung inuyat, anya quetang minuli ke Sasmuan, anyang memalengki cami Wawa (Guagua), iyang antimanu a linub quiñg cacung caisipan. Meglalawe queng Ateng cu, at quiñg cacapangutang. Tiru da que, queng arapan ning tindajan ng Ating Dorina. Sinali cung adwang lata. Tsa P50.00 mu naman ing lata. Dinalan la reng adwa, mekigayo-gayo ya y Ateng cu. Sinali ya naman. Ing metung lata, pagisan ne. Atno caburi reng apo cu…ampon ing cadwa cung pangane. Iyang pagmayumu reng apu cu! 😋😋😋

-Ambag neng Onarres Beltran Jane

INUYAT

Posted in Ambag, Pamangan | Leave a comment