nang Apung Gusting
04/09/18 Riyadh
I
Ing amanu tamu labuad kapampangan
Magjingalu ne king baul nang karinan.
Makatibi ne king marimlang kutkutan
Uling gilutan ye, ikong kayanakan!
II
King sibuburyan yung sabing Amerkanu,
Mangat ko wari at ing atut yu manglu?
Kapampangan ya ing amanung sinusu,
Obat tagalug ing yapse ring asbuk yu?
III
Nung king panákit yu mitatas ko uri,
King pámanapse yung amánung é bandi,
Sabyan kung mátaktak ken ko magkámali,
Saulan yé pa buluk ing taklang mélangi.
IV
At nung isipan yung mitawli kó beluan,
Kareng síping bale a managálug ngan,
Ustung mepande kó king amanung sisuan,
Ala kóng kurulan kareng sabing daywan!
V
Luguran ye sana ing kekong amánu,
É yé sasamútan king salitang kántu.
Lakwas é ko dápat tutuki king úsu,
Itang bungálan ye’t susúlat é ustu.
VI
Iyanad yé iti karen alang male,
Ban é la gaguti king karelang yápse.
Sáne yeng sambitlan king pibalebale,
Ban ing pundasyun yu síkan ya’t tumíbe.
VII
Mipangapampangan ko kareng aguman
Gamitan ye iti karing talamitam
É ye pikarine agyang kénu pa man,
Kintal ye’t dangal ning líping mayakayan.
VIII
Anya luid kayung ának Kapampángan,
Láji kong maléguan at maki tépángan.
Pagmaragul yé ing amánu yung ménan,
Karing sablang labuad a kékong santungan!
