POESIANG KAPAMPANGAN… makawiling babasan, malambing pakramdaman! Kabud abasa ta la pu, mangising la sana kapanamdaman ban lakuas kuri ing daya tamung Kapampangan, pagmaragul at pamingua taya ing Amanung sinusuan.
-PL Maria Teresa Magtuloy-Evangelista
Ninu ya kanu ing poeta kung balu?
Ing tune talasulat at talaturu
Tutung magmalasakit, e biru-biru
Poetang lulugud king Amanung Indu
Masuyu king Guinu, kultura’t pamilya
Deni ngan ilang pekainspirasyun na
Bawat makuyad man o makabang obra
Gawang mitmung tula, gawang maulaga
Mayap sumulat, masanting kawatasan
Kabud gagambul, kulturang kapampangan
Metung yang ejemplo kareng kayanakan
Karelang panyulung ba rang asumpungan
Sana ing pamanyulat na e magwakas
Nune lumabung pa, manyilad pang lakwas
Metung yang alimbawa deng tune pantas
Ing galang at pugue para kaya matas
-e bisang pabalu
King tindig mu pamu at santing a bulas,
anti kamo waring paleng mamutikas,
ing tagle mung leguan , e sana kukupas,
inya sa’t nasa ku , magblooms kapang lakuas,
ban apasaya me ing pusu kung lubas,
a maluat na murin mibata keng kaplas.
Atin kung akilala sabyan ke keka
Metung yang kaladua, ibat babo banua
Dintang ya king bie ku, eku piadyan pa
Ngeni ya ing kakung Anghel dela guardya.
Ing dati nang madalumdum at malungkut
Ing bie keng bawat aldo simpli ya durut
Ala mang aligwat, saya kakaramput
Aldo’t bengi, banua-banua, dimut dimut.
King minsan a aldo kabud nyamu dintang
Ing metung a taung e ku akalingwan
Dininan neng saya’t mitmung katuturan
Kabud mesala ing bie kung paulagan.
Kakung Anghel, salamat kekang panyatang
Minie sala’t pag-asa king dalumduman
King bie kung ini e danaka kalingwan
Ing lugud ku keka alang kayangganan.
-E Bisang Pakilala
© Bagse Ning Kailugan
Mamagut kung paku king diwa babalik
Ing pepayalduk mung salpak ampon pait
King kalulung watas kusa mung linapit
Aniang malsinta ya likuan mu pasakit.
King dulum na ning bie ikang salang sinlag
King pusung tatangis ika ing menaplak
Anyang kayang kamtan ing tula’t sagakgak
Bigla kang linaut likuan mu pagsalbat.
Ante ing simpa mu king bigung poeta
A ngamung sasabi wari’t magtaksil ka
Padukit mo detang kekang aduang mata
At layun patluran ing kekang inawa.
Ing mamagut paku keyang peniwalan
Itang kekang sumpang pawang kalaraman
Uling king depat mu mitda ya tagimpan
Ing kakung kaladuang manayang lingapan.
Ing mamagut paku manaya king lingap
Menwalang tumula king sinta mung wagas
King kekang depatan balas yang meyagas
King agus na ning lua dening matang kikiak.
Kening malukang bie malablab kang api
A manyilab ketang kekang babie pali
Makanyan man mutya ing kakung pangadi
Patawaran ning dios ing depat mung mali.
King depat mung iyan e raka asumpa
Agyang gisan mu nang pepatulu ing lua
Inya kakung adwan king dios ma-upaya
King kekang depatan ing ligaya ka sa’.
Dakal a salamat king taksil mung lugud
At king kekang sumpang e tutu at matbud
Nung tinangis ku man ing lua kung minagus
Tiki na ing kaplas king pusung sisiguk.
Petsa
* 2 0 2 0 *Uling malugud tamu, e tamu PUSUNG BATU karas king lugud.
Kapuri-puri ka Kapampangan!
-PL Maria Teresa Magtuloy-Evangelista
-Indung Kapampangan, Central Luzon Daily
Serbisyal at malugud tamu pu, king pamilya,nia reng PALIPI tamu pu mayap la lulut.
Kapuri-puri ka Kapampangan!
-PL Maria Teresa Magtuloy-Evangelista
-Indung Kapampangan, Central Luzon Daily
Metung a pagmaragul tamu itang Kapampangan, yapin ing kalutung manganiaman. PAMANGAN CAPAMPANGAN, E LA MALACUAN. Agad dang sabian, basta Kapampangan biasang magkalutu. Makanian mu naman pu ing dimdam ku king katuangan kung babai nia penikuanan ku king e ya madismia 😉 Kapuri-puri ka Kapampangan!
-PL Maria Teresa Magtuloy-Evangelista
Central Luzon Daily -Indung Kapampangan
(Mayap a payul)
Irvin Harvey Rivera
Siuala Ning Maliwalu/Anac Ning Baculud
August 24, 2018
Ing kekang paintungul e mi balu rugu,
Nung managumpe ka o muli kang bigu
Nung nasa mu king biye, king mayap painturu,
Masampat a buyut, sukat mung isundu.
King pamaglakbe mu, sukat mung ukulan
Ding bagebage king bie mu’t paintungulan
Datang ing panaun keka mung tangisan
At Ing pamagsisi pijung katatawlian.
Menasa, ikaming kekang talagabe
A tibud ning Guinung sandalan mung takde
Alang meging marok, pengaring metunggue
A turu king Anak king ba yang mipande.
Inya sana, Anak, e mu sa’ kakamwa,
Sasabyanan daka king marok mung gawa
Ala namang marok at dapat ikamua
Buri mi’ng maging ka’ng mayap alimbawa.
Ding kekang taguimpan isundu mong mayap,
King masanting a biye, sukat kang migagap
Sesen mu king lugud, tibubus a lingap
Ba’ mu ping ayabut ding sablang pangarap.
(Pugue para king Aguila Ning Apalit
Poeta Laureado Intl. Atty. Almario C. de Jesus)
MALA-SONETO
Siuala Ning Maliwalu/Anac Ning Baculud
October 10, 2019
Kangatba ning Bebe lipat na ning Sapa
Karin ya mibayit mabudning Makudta
Bista man meratun ne aliwang Bangsa
Ing keyang Amanu gimbul neng matampa.
King sikap, sipagan ning kayang panyulat
Akit mung mayap ing lebasan nang daklat
King Sintang Amanu migsilbi yang tapat
Marapat yang tungguen, itas adwang gamat.
King alang patna nang lugud king Amanu
Miparangalan yang Poeta Laureadu
Almario De Jesus—metung Abogadu,
Talapagluwalu, mabudning padrun ku.
Kangatba ning Bebe lipat na ning Ilug
SINTA KUNG AMANU e mamit a lumbug.
Ernie Turla, Irvin, pagmaragul kung aku ing mig-nominate kang Sir Amor para maging poeta laureado. Aku naman sanang mamutung koronang bulung laurel kaya king Cascade Locks, oneng meka-alal neng ari ing Parnasong Kapampangan kanita, y Renato Alzadon a kinironan ku a few years before, at ya na mu ing pepamutungan ku.
Almario C. de Jesus Pasalamat at pagmaragul cu ing meging cakilala a caluguran y Sir Ernie Turla at ing maganaca at malagung asawa na y Atsing Angie.